Danmarkimi efterskolet ammaqqilerput: Atuartut nunatsinneersut uteqqusaanersut nalunarpoq

Danmarkimi sisamanngormat atuartut tusintilippassuit akornanni nuannaarnersuaqarpoq. 

Ministeriuneq Mette Frederiksen (S), atuartut 6. klasseniit 10. klassenut maajip ulluisa 18-iannit atuariartoqqissinnaalernissaat nalunaarutigaa.

Taamaalillutik efterskolertut atuaqatitik ilinniartitsisutillu takoqqittussanngorpaat.

Tamannali atuartunut Kalaallit Nunaanneersunut 130-usunut efterskolet matummata Nunatsinnut uterallarniarlutik aalajangertunut atuunnersoq nalunarallarpoq. 

AAMMA ATUARUK Danmarkimi efterskolertut: Ikinngutivut maqaasivagut - Brugsenimillu ujariatsilluta

Danmarkimi Efterskolet peqatigiiffiat kiisalu Ilinniartitaanermut Aqutsisoqarfik KNR-imut taama nalunaaruteqarput.

Atuartut aasaanerani atuarunnaarnissamut qaammataannaq sioqqullugu Danmarkiliaqqinnissaat peqqissutsimut isumaannaatsuunersoq Kalaallit Nunaanni peqqissutsimut oqartussat nalilersoqqaassavaat.

Angallannermut killeqartitsinerit maannakkutut isikkoqartillugit, atuartut nunatsinnut angerlannginnerminni corona viruseqarnerlutik misissorteqqaassapput angerlareernerminniillu ullut tallimat qangiusimalerpata misissorteqqillutik.

Taamatuma saniatigut Kalaallit Nunaannut angalanermut maleruagassat qaammatip tulliani allanngorsimanngippata ullut 14-t angerlarsimaannaqqusaaqqaassapput.

Galtrup Efterskole katersuuffinngorsimavoq

KNR pisoq pillugu Tunillaassortunik nappaalanersuaqarneranut ataatsimiititaliarsuarmut oqaaseqartitsiniaraluarpoq, sulili iluatsinngilaq.

Jyllandip avannaani Galtrup Efterskole kalaallinut efterskolertunut nunatsinnut utersimanngitsunut, ilaqutariinniluunniit attaveqarfissaminni najugaqanngitsunut katersuuffinngorsimavoq.

Atuarfik kalaallinik 50-nik ulluinnarni atuartoqarpoq. Taakkunani atuartut 21-it efterskolet matummata angerlarallarnissartik aalajangerpaat kalaallillu efterskolertut allat sisamat Galtrupimukarsimallutik. Aamma Svendborgimi umiartortunngorniarfimmi atuartoq kalaalleq ataaseq taamaaliorsimavoq.

Tamanna pivoq, atuarfinni allani atuartut nappaatip Galtrup Efterskolemi siaruaatinnginnissaa anguniarlugu Thymi sapaatit akunnerini marlunni aallarsimaareermata.

KNR sapaatip akunnera kingulleq pulaarmat matematikkertitsisoq Enok Skifte ima oqaluttuarpoq:

- Atuartut sinnerisa inuuneq maani pisarneratut ingerlappaat. Allanngunngilaq. Atuarfimmiiginnaqquneqarput, illoqarfiliaqqusaanatik inunnullu akuleruteqqusaanatik. Atuartitsineq suli ingerlavoq.

Mette Frederiksenip nalunaaruteqannginnerani neriuuteqarsimavoq efterskolertut atuarnertik naliginnaasumik naggataarsinnaassagaat.

- Neriuppunga, Enok Skifte oqarpoq.