Danmarkip Tunup avannaarsua ukiut 80-it matuma siorna qulakkeerpaa
Tunup Avannaata naalagaaffimmit sorlermit oqartussaaffigineqarnera Norgemit Danmarkimillu piffissami sivisuumi aaqqiagiinngissutigineqareersorlu kingorna tamanna pivoq.
Puisinniarneq norgemiut taavani 1800-ikkulli qiteqqunnerannit ingerlattarsimavaat, soorlu aamma nannut, umimmaat aarrillu piniagarisarsimangaat, taamaattumik Norge nunamut piginnittuullutik.
Kalaallit Nunaannut tamarmut Danmark nammineq piginnittutut 1919-imi nalunaarutigivoq. Norgemiulli akipput, Tunup Avannaa inoqanngitsoq, nunalu pigineqanngitsoq.
Apriilip ulluisa tallimaat 1933 tikillugu isumaqatigiinngittoqarpoq, Haagimi nunat tamalaat eqqartuussiviata Danmark piginnittutut nalunaarutigimmagu, tamannalu norgemiut akuerivaat.
Haagimi eqqartuussiviup ilanngullugu aalajangerpaa, Kalaallit Nunaata Tunuata Avannaarsua naalagaaffeqatigiinnerup iluaniiginnassappat, piumassuseqarluni taavaniinnikkut ersersittariaqartoq.
Tamatumunngarpiaq peqqutaavoq qimusserlutik 1952-imi alapernaarsuisartut Siriusikkut pilersinneqarnerat, siunertaralugu naalagaaffeqatigiit nunamik piginnittuunerata erseqqissarnissa, sinerissamilu inoqanngitsumi 16.000 kilometerisut isorartutigisumi nakkutilliinissaq.
