Danmarkimut efterskoleriartut danskisut piginnaasakittarput
Inuusuttut ilinniarnerminnut atatillugu oqaatsitigut piginnaasakinnertik aporfigikkajuppaat, atuanngiffeqartillutillu akornutigisarlugu. Københavnimi ilinniartut siunnersortaat, Pia Rosing Heilmann taama oqarpoq.
- Ilinniartut immikoortittariaqarpavut. Efterskoleriartut ukioq ataaseq Danmarkimiittussat akornanni 90 procentii qallunaatut iluamik paasisinnaanngillat paasinartumillu oqalussinnaanatik. Taamaammat siunnersortit maannga sianertarput oqarlutik, ilaasaluunniit qassinut nerisoqartarnersoq paasisinnaanngikkaangassuk oqalutseqartariaqartarlutik, Pia Rosing Heilmann oqarpoq, nangillunilu; ajornartorsiut iluarsiartunngimmat siunissamut aarleqqutigalugu.
Qaffasinnerusumik ilinniagaqarniartut akornanni pissutsit iluarnerulaarput. GU-mi naammassiinnarlugu ilinniariartut qallunaatut piginnaasaqarnerupput. Taamaakkaluartoq ilaat oqartarput atuarnerminni paatsuugaqartarlutik, kammalaatitaallu akornanni aamma paatsooqatigeeqqajaasarlutik.
Pia Rosing Heilmann oqarpoq, nalunagu ilinniartoq ataaseq Nunatsinnut angerlaannartariaqarsimasoq qallunaatut piginnaanikinnini pissutigalugu.
Pia Rosing Heilmann, isumaqarpoq oqaatsitigut piginnaasakineq assigiinngitsorpassuarnik peqquteqartoq. - Politikerit ilaat oqartarput kalaallisut oqalukkutta naammassasoq, tamanna uanga isumaqatiginnilara. Taassuma saniatigut meeqqat atuarfianni qallunaatut ilinniartitaaneq annikilleriarsimavoq, aamma GU-mi qallunaat oqaasiinik dansk-A-mik taagukkamik, ilinniartinneqartaraluarput, Danmarkimili dansk-A-mik taagukkamiit taanna allaanerujussuuvoq, ilinniartut siunnersortaat, Pia Rosing Heilmann oqarpoq.
