Danmarkimut efterskoleriartussat aatsaat taama amerlatigaat
Atuariartortut 309-iupput. Siornamut naleqqiukkaanni 50-inik amerlanerullutik, Atuarfitsialaallu 2008-mi aallartinneqarneraniilli aatsaat taama amerlatigalutik.
Danmarkiliartut ilagaat Ôdâk’ Olsen, taanna Lyngby Efterskolemi atualertussaavoq. Danmarkiliaqqaatigivaa.
- Aatsaat Danmarkimukalerpunga, qangali tikikkusuttarlugu, periarfissaqaleriarama aallarpunga.
Suna qilanaarinerpaaviuk?
- Cola 2-literi.... Naagga, asuliuna - inunnik naapitaqarnissara ikinngutitaartornissaralu qilanaarivakka. Inuttut ammanerulernissara neriuutigaara, Ôdâk’ Olsen, Lyngby Efterskolemiinnermini parkourertartutut soqutigisaminik aallutaqarniartoq taama oqarpoq.
Naak ukiormanna efterskoleriartut amerlagaluartut, inissat nalinginnaasumik tunniunneqartartut iluaniipput, Oqaatsinik Pikkorissarfik Sisimiuniittoq Danmarkimi efterskolernissamik qinnuteqaatinik suliaqartuusoq paasissutissiivoq. Siunnersorti Kunuunguaq Fleischer naapertorlugu itigartitsisoqarpiarsimanngilaq, qinnuteqartullu itigartitaasut tassaakkajupput Danmarkimi ilaqutariinnik attaveqarfissaminnik nassaarsimanngitsut.
Danmarkimulli tikinneq inuusuttunut tupaallannartupilussuusinnaavoq. Kalaallit Illuutaanni Ilinniartitaanermut immikkoortortap paasissutissiissutigaa ukioq atuarfiusoq aallartinngitsorluunniit inuusuttut pingasut angerlarnissannik aaqqissuussereersimalluni.
