Danmarkimut aallartitaasarsimasut ataatsimoorfeqalernissaat ujartorpaa

Meeqqat pikkorinnersiukkat 1960-70-kkunni Danmarkimi ukiinerat nunatsinnut piorsarsimassutsikkut annertuumik qaffatsitsivoq, meeqqalli ukiisut ilaat tarnikkut ikilerneqarsimanertik pissutigalugu ukiorpassuarni anniaatissaminnik nalaataqarsimapput.

Valentina Ingemannip misigisapalaani ukiuni 36-ini kisimiilluni pigisimavai, tusagassiutitigullu ukiisitsineq pitsaasumik eqqartorneqaleraangat kamak angeqisoq misigilersarpaa.

- Uanga nammineq misiginikuugakku taavalu nalunagu amerlasoorpassuit taakkunani meeqqani atornerlugaanikuusut, unatagaanikuusut arlaatigullu sumiginnaagaanikorujussuusut, taamatullu nalaataqarnikut aamma arlallit imminoornikuupput, qassimmitaava taamatut iluatsitsinngillat, soormi toqqorneqassagatta? Valentina Ingemann aperivoq.

Valentina Ingemannip tarnikkut anniaatini inersimasunngorami qallunaaluarnermut saatsissimavai.

- Innarligaaneq annertungaarmat qallunaatut inooriaaseq ajattorluinnarsimavara ullaakkut iternermi godmorgeneertarneq innalernermi godnateertarneq imaluunniit qujaneq qallunaat inooriaaserimmagu uanga atorusussimanngilara, meeqqakka angerlarsimaffitsinni qallunaatut oqalutsikkusussimanngilakka, Valentina Ingemann oqaluttuarpoq.

- Naapeqatigiinnissarput pisariaqartippara ataatsimullu suleqatigilluuta ikioqatigiittariaqartugut ikiortariaqartugullu, Valentina Ingemann naggasiivoq.

Tarnip nakorsaata Ernst Peilmannip naapeqatigiinnissaq isumassarsiatsialaanerarpaa.

-Kingusinaartoqanngisaannarpoq. Soorunami taamanikkut utermatali ikiorserneqarnissaannik piareersimasoqarsimasariaqaraluarpoq. Taamatut naapeqatigiittarnissaq ujartorneqartoq tapersersorluinnarpara, pissutigalugu eqimattanngorluni aniatitseqatigiinnermi peqataasut ilaat oqaasinngortitsisinnaanngitsut, ilatik aniatitsinerisugut oqaasinngortitsinissamik ilinniartarmata, Ernst Peilmann oqarpoq.