Qallunaat Nunaannit ukioq mannamut 5,3 millioner koruunit aningaasaliissutigineqartut saniatigut Qallunaat Nunaata aningaasanut inatsisaatigut 2020-mit 2023-mut katillugit 80 millioner koruuninik aamma aningaasaliisoqarpoq. Tasiilap assiga toqqorsivimmeersoq.Assi: Larsen Jens Kragh

Danmarkimit ikiorneqarneq: Tasiilami isumaginnittoqarfimmiut ilitsersorneqarnertik nuannaarutigigaat

Inunnik isumaginninnermi siunnersortit sisamat Danmarkimeersut Tasiilami inunnik isumaginninnermi ingerlatitsivimmi decembarip qaammataata aallartinnera ilanngullugu ikiuussimapput. - Iluaqutaasorujussuupput, kulturerpullu ataqqillugu, Tasiilami sullissisoq oqarpoq.

Qallunaat Nunaat nunatsinnut ukiarmi 5,3 millioner koruuninik aningaasaliivoq.

Tamanna Naalakkersuisut ikioqqoreersut pivoq. Taakkualu ilaatigut tarnip pissusaanik ilisimasallit aamma inunnik isumaginninnermi siunnersortit, pingaarnertut Tasiilami, ikiuigasuartinneqarnerannut atorneqarput.

Aningaasaliissutigineqartullu ilaat Tasiilami inunnik isumaginninnermi siunnersortit pikkorissarneqarnerannut atorneqarput.

- Aap, tassa Danmarkiminngaanniit tikisitanik ikiorneqaratta Tasiilami. Taakkulu iluaqutaasorujussuupput, taavalu uatsinnut suleqataalluarlutik kulturerput ataqqillugu. Inuit kinaassusaat ataqqillugu. Uagutsinnut pulalluarlutik suleqataapput akuullutik, Sara Grønvold Kristensen oqaluttuarpoq.

Taanna Tasiilami kommuunip allaffiani meeqqanut ilaqutariinnullu sulissivimmi sulianik ingerlatsisutut atorfeqarpoq.

AAMMA ATUARUK 80 millionit koruunit kalaallit meerartaannut Folketingimit aningaasaliissutigineqarput

Qallunaat Nunaannersut inunnik isumaginninnermi siunnersortit sisamat novembarip qaammaataani Tasiilamukarput, taakkualu decembarip qaammataata aallartinnera ilanngullugu Tasiilamiipput, ilaatigut inunnik isumaginnittoqarfimmi sullissinermut ikiuiutigalutik sullissisunik pikkorissaallutik.

- Uagutsinnut isumaqartorujussuuvoq taanna. Takunnissinnaanerulerpugut, qamisaaginnarnata sulianut malinnaasinnaanerulerluta sulianik ingerlatsisutut. Taavalu ilinniartinneqarluta, soorlu makkua qanoq sullitat sullikkaanni pitsaanerua aamma tassani qitiutinneqarami innuttaasunut sullitat qanoq pingaaruteqartiginera, Sara Grønvold Kristensen oqaluttuarpoq.

Tamannalu Tasiilami iluaquatigineqaleersoq taanna naliliivoq.

- Ilikkarnarpoq, nammineq sullissisutut tunuarsimaarnani aamma sullitat angerlarsimaffiannut ornigussinnaalluni. Paasiniaasinnaalluni qanoq sullinneqarunik pitsaanerussanersoq, soorlu tamakkua pingaaruteqartorujussuupput aamma sulianik ingerlatsisutut, Sara Grønvold Kristensen oqarpoq.

AAMMA ATUARUK Kalaallit meerartaasa aningaasaliiffigineqarnerat nunatta Folketingimi ilaasortaatitaasa nuannaarutigaat

Sara Grønvold Kristensenillu Tasiilami inunnik isumaginninnermi sullissisut Qallunaat Nunaannit ikiorneqarnerat sulinerminnut oqilisaataasoq malugisimavaa.

- Kalaalertaqallattaarpoq akornatigut ikiuukkiartortut. Uteqqinnissaannut neriuuteqarpugut suli. Suliassaqarmata suliareriikkaminnik, ilai ingerlataqaqqissammata. Suli pisariaqartipparput ikiorneqaqqaarnissarput, atorfinittoqartussaagaluarpormi, kisiat suli pisariaqartilaarparput, taakkua suliat nutaanngitsut nangeqqinneqarnissaat, Sara Grønvold Kristensen oqarpoq.

Sara Grønvold Kristensenip oqarnera naapertorlugu inunnik isumaginninnermi siunnersortit pingasut, marluk kalaallit ataaserlu qallunaaq, Tasiilami meeqqanut ilaqutariinnullu sulissivimmi januaarip qaammataani atorfinitsinneqassapput.

Qallunaat Nunaannit ukioq mannamut 5,3 millioner koruunit aningaasaliissutigineqartut saniatigut Qallunaat Nunaata aningaasanut inatsisaatigut 2020-mit 2023-mut katillugit 80 millioner koruuninik aamma aningaasaliisoqarpoq.

Qallunaat Nunaanni isumaginninnermut ministeri, Astrid Krag, nunatsinni inunnik isumaginninnermut naalakkersuisumut, Martha Abelsenimut, ukiarmi isumaqatigiissuteqartuuvoq. Isumaqatigiissutigineqartoq naapertorlugu nunatsinni meeqqat inuusuttuaqqallu ikiorserneqarnissaminnik pisariaqartitsisut immikkut iliuuseqarfigineqassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat