Danmarkimi ullumi qinersisoqarpoq
Qinersisartut 4.412.262-iusut byrådinut kommunalbestyrelsinullu qinigassanngortittut 9.082-iusut regionsrådinullu qinigassanngortittut 1.1163-iusut arlaat qinersinnaavaat.
Kommunimut qinigassanngortittorpassuit ukiui agguaqatigiissillugit 50-iupput, regionsrådinullu qinigassanngortittut ukiuisa agguaqatigiissinneri qaffasinnerulaarlutik 52-iullutik.
Arnallu angutillu agguataarsimaneri qiviaraanni angutit amerlanerussuteqarluarput. Kommunimut qinigassanngortittut 6.286-iupput arnallu 2.796-iinnallutik. Tamanna aamma regionsrådinut qinersinermut atuuppoq, tassanilu angutit 828-t arnallu 335-t qinigassanngortimmata.
Qinersisartut isumaannik misissuinerit kingulliit takutippaat borgmesterinngortitsinissamut tunngatillugu Socialdemokraatit partiilu Venste qanittuararsuusut. Socialdemokraatilli Danmarkimi kommunini anginerni sisamani borgmesterinngortitsinissaat ilimagineqarpoq, tassalu Københavnimi, Aarhusimi, Odensemi Aalborgimilu. Enhedslisten aamma Dansk Folkeparti Liberal Alliancelu partiini siuariarnerpaasussatut ilimagineqarput, de Konservativellu SF-ilu qinersinermi ajorsarujuussuartussatut ilimagineqarlutik.
Qineqqusaarnermili Nunarput aamma kalaalerpassuit Danmarkimi najugallit, oqallisigineqarpallaarneq ajorput.
Rasmus Rose, SF-ip Københavnimi immikkoortortaani siulittaasoq aamma IA-p Københavnimi immikkoortortaani siulittaasoq Ortu Mørch Olsen ataatsimoorlutik oqaaseqaateqarlutik taama erseqqissaapput.
- Kalaallit Danmarkimi najugallit 18.000-iupput, taakkunanngalu 1.500-t missaat "inuuniarnermikkut atugarliortutut" taaneqarsinnaapput, taakkununnga ilaallutik 350-it Danmarkimi illoqarfinni assigiinngitsuni angerlarsimaffeqaratik inuusut.
Amerlanerpaartaalli inooqataalluartuupput, qallunaallu allat assigalugit inuiaqatigiinni inooqataalluarlutik, SF-ip IA-llu siulittaasui oqarput.
Taamaattorli kommuninut qineqqusaarnernut atatillugu pingaarnerutillugit sammineqartut tassaapput, kalaallit inuuniarnikkut ajornartorsiuteqartut taakkulu inuiaqatigiinni akuulernissaminnut periarfissaat. Ilaatigut kalaallit Danmarkimut suli nuutsinnagit akuunerulersitsinissamik suliniuteqarnerup pitsaanerulersinneqarneratigut.
- Isumassarsiat pitsaagaluaqaat, naammanngitsulli Rasmus Rose aamma Ortu Mørch Olsen isumaqarput.
- Taamaattumik kalaallit Danmarkimi pitsaasumik inooqataasut isumalluutitut isigilissagivut pingaaruteqarluinnarpoq, taamaalilluni isummat pigiliutiinnakkat kalallinut tunngasut iliuuseqarfigineqarniassammata.
- Kalaaleqatissi Danmarkimi toqqissisimanartumik inuuneqalernissaannut ikiuuteqataagitsi. Suleqataagitsi, taamaalilluni Danmarkimi kalaallit isigineqarnerat assigiiaarpallaarunnaarniassammat, siulittaasut marluk oqarput.
