Danmarkimi qinersisoqassanngikkallarpoq
- Suliagut suli naammasseqqajanngilagut. Qinersisitsinissamut pilersaaruteqanngilanga. Nunap matuma aqunnissaa eqqarsaatigaara, statsministeri oqarpoq.
Taanna Danmarkimi ineriartortitsinissaq sulissutiginiarlugu oqarpoq:
- Danmarki aningaasatigut ajornartorsiornermit aniguisissimagatsigu nuannaarutigaara. Ernummatigisinnaasamit qaangerluarneruarput. Maanna Danmarkimi inuiaqatigiit akornanni ineriartortitseqqilernissaq neriuuteqarlunilu inuuleqqinissaq sulissutigissavarput. Tamaattumik aasami sulinngiffeqarneq aallartitsinnagu ineriartortitsinissamut suliniutissanik isumaqatigiissusiortoqassaaq, Lars Løkke Rasmussen oqarpoq.
Ineriartornissamut suliniutit Lars Løkke Rasmussenip oqaasii malillugit, tassaapput suliniutissat pingasut. Suliniutit ilaat tassaavoq, Danmarkimi nunasisunik siuaasalinnik amerlanernik sulisitsilernissaq.
- Naalakkersuisooqatigiinni politikki ingerlatarput iluaqutigalugu, Danmarkimi nunasisut suliffissaqartinneqartut amerlanerulerput. Nunasisut sulisartut ilinniagaqartullu amerlipput. Taamaakkaluartoq siunissami anguniakkagut suli annertupput, Lars Løkke Rasmussen oqarpoq.
