Danmarkimi 'Qaqqat Alanngui' isiginnaariarusunneqarluartoq
Filmertarfimmit Husets Filmimit oqarnerat naapertorlugu bilitsinik inniminniisut imaaginnavipput, filmillu pingasoriarluni takutinneqarnissaani inissat ulikkaavittassangatippaat. Filmertarfimmi aallakaatitassiortup filmi pillugu allaaserisaq atuarsimavaa, paasillugulu filmi Kalaallit Nunaanni nuannarineqarnersaasoq, takutinneqarnissaalu isumassarsiaraa.
- Kalaallit Nunaat allatorluinnaq ittoq inuppassuarnut takutikkusuppara, takusartakkavummi - takorloortakkavulluunniit - ajoraluartumik allarujussuusarput. Takutikkusuppara nutaanik pilersitsisinnaasunik aamma inoqarmat, kulturi uagut takorluukkatsinnit nalunngisatsinnillu allarluinnaq. Takutikkusunneranulli siullermik pissutigaara, isumaqarama suliaasoq pissanganartoq, filmiusorlu pissanganartoq takutittariaqarluinnartorlu, Elias Eliot KNR-imut oqarpoq.
Qaqqat Alanngui Illu Atlantikumi filminik takutitsisaqattaarnermi ukioq-manna siusinnerusukkut takutinneqarpoq, taamanilu aamma ima nuannarineqartigaaq, pingasoriarluni immikkut takutinneqartariaqarluni. Filminik Kalaallit Nunaannut tunngassuteqartunik Kalaallit Nunaanninngaanneersunilluunniit Berlinimi upernaaq takutitsinersuaqarmat Qaqqat Alanngui aamma ilaavoq. Tumit Productionsimit siusinnerusukkut nassuiarneqaraluarpoq, filmiliartik kalaallinut tunngatinnerugitsik.
