Danmarkimi kalaallit palasissaat: Kalaallit danskisut naalagiartalissappata eqqumiissaaq

Danmarkimi kalaallit danskisuinnaq naalagiartalissagunarput.

Danskimmi naalakkersuisa Danmarkimi upperisani tamani naalagiartitsinerit tamarmik danskisuunngikkunik danskisuumut nutserneqarnissaannik siunnersuutaat amerlanerussuteqartunit akuerineqarpat taamaattoqariaannaavoq.

Tamanna Danmarkimi nunanilu allani muslimit ingasaassiniat ilaasa ataasiakkaatigut takuneqartareertutut qinngarsuinissamut peqqarniisaarniarnissamullu anngiortumik kajumissaarinissaannik pinaveersaatitsissutaassaaq.

AAMMA ATUARUK Danskit oqaluffiini kalaallisut naalagiartitsisarneq aarlerinartorsiorsinnaasoq

Danmarkimilu kalaallinut Aarhusip biskoppeqarfiani decembarip aallaqqaataani palasiulertussaq, Marianne Lynge Krogh, taamatut siunnersuuteqarnerannut tunngaviatigut paasinnippoq.

- Danskit naalakkersuisui inuiaqatigiinni ajortisaarineq allaallumi peqqarniisaarniarneq akiorniarlugit taamatut siunnersuuteqarmata paasisinnaavakka.

Siunnersuutaalli Marianne Lynge Kroghip atuuffissaanut, tassa kalaallinik naalagiartitsisarnissaanut sunniuteqarnerlussinnaavoq.

Eqqumiippoq. Kalaallisummi naalagiartitsisoqartarnissaa siunertaralugu kalaallimik palaseqartitsipput. Taamaaliortoqanngippammi danskisut naalagiaannartarsinaammata, taanna oqarpoq.

Naalagiarnerit nakkutigisaareersut

Siunnersuut qanoq ittuulerumaarnersoq oqaatigineqarsinnaanngikkallarpoq.

Marianne Lynge Kroghimi danskillu oqaluffiini palasit allat isertugassaqanngitsut, taanna erseqqissaavoq.

Iivangkilistimmi lutherikkullu oqaluffii qinngarsuinissamut kajumiissaarinngisaannarlutik asanninnissamut, isumakkeerinninnissamut isumakkeerfigeqqunissamullu kajumissaarisuupput.

Palasillu oqaluussissutaasalu imarisaat tamarmik biskoppimit nakkutigisaareerput.

- Taamaammat danskisut naalagiartalertariaqanngillat, Marianne Lynge Krogh oqarpoq.

AAMMA ATUARUK Biskopimik nutaamik qinersineq: Pikkunarpoq oqaasertaleruminaappoq

Danmarkimi kalaallit ilagiit oqaaseqartartuata, Charlotte Nebel Pedersenip, Marianne Lynge Krogh taperserpaa.

Marianne Lynge Kroghip kalaallinut danskisut naalagiartitsisaleqquneqarnissaa, taassuma ilimaginngilluinnarpaa.

- Ministeriunerup tamanna Danmarkimi ilagiinnut kalaallinut savalimmiormiunullu piumasarissappagu ingasappallaassaqaaq. Pisunimi taamaattuni lutherikkut kristumiullu upperisaasa aqqini tapersersoqatigiittariaqarpugut, taanna KNR-imut allappoq.

Palasi: Siunnersuut ataasiakkaanik pitsaaquteqarpoq

Siunnersuulli ataasiakkaanik pitsaaquteqartoq, Marianne Lynge Krogh isumaqarpoq. Tassa ingammik kalaallinut danskit oqaasiinik ilitsoqqusalinnut qanigisaasunulluunniit kalaallisut naalagiarusuttunut.

- Kalaallinummi danskit oqaasiinik ilitsoqqussalinnut aappaasunulluunniit naalagiartitsinermi oqaluussissutinik paasinnikkusuttunut iluaqutaasinnaavoq. Taakkuami immaqa qujarutissavaat, taanna oqarpoq.

Tamanna inatsisitigut piumasaqaataalissappat taanna suliassaqarnerulernavianngilaq, danskimmi oqaasii ilitsoqqussarigamigit oqaluussissutissanilu danskisut allariarlugit kalaallisuunngortittaramigit.

Tamannali Danmarkimi palasinut allanut soorlu savalimmiusut tyskisulluunniit naalagiartitsisartunut sunniuteqanngitsoornavianngilaq.

- Taakkua soorunami suliassaqarnerulissangatippakka, Marianne Lynge Krogh oqarpoq.