Biskopimik nutaamik qinersineq: Pikkunarpoq oqaasertaleruminaappoq
Paneeraq Siegstad Munk taaguunneqarnerpaavoq. Provsti 43-nik ukiulik Qaqortumi najugaqarpoq, maannalu nunatsinni biskopinngortussanngorpoq.
- Imaannaangitsuusoq nalunnginnakku, pikkunartumik oqaasertaleruminaatsumik misigivunga. Angajoqqaakkalu qamaniitseqalugit, asannitsikkalumi aamma eqqarsaatigaakka, tuppallerlunga tiguara.
AAMMA ATUARUK Paneeraq Siegstad Munk nunatsinni biskopinngorpoq
Biskopinngortussaq sisamanngornermi Qanoruumit apersorneqarluni taama oqarpoq. Nunatta ilagiivini siuttunngussaaq.
Taanna Sofie Petersenimut taartissatut, pingasunik allannik qineqqusaaqateqarpoq. Taakkunanilu Paneeraq Siegstad Munk taaguuneqarnerpaavoq. Biskopi nutaaq atorfimmini decemberip aallaqqaataani atuutilissaaq, anguniagassanilumi pingaarnersiulereerpai.
Ajoqit periarfissineqassapput
Biskopinngortussap nunatta sineriaani ajoqit oqaloqateqarnerup tungaatigut pitsaanerusumik atugaqalernissaat sulissutiginiarpaa.
- Nunaqarfinnguami inukitsumik imaannaanngitsumik atugaqaraangamik, annissuiffissaat ersarippallaanngillat. Tassani kisimiittutut misiginnginnissaat, aningaasarpassuarnik naleqanngikkaluartoq, qulakkeerneqarsinnaavoq palasimut, immaqaluunnit provstimut biskopimulluunniit sukkanerusumik attaveqaqatigiinneq pitsaanerusoq atorneratigut, Paneeraq Siegstad Munk, oqarpoq.
Taanna Kalaallit Nunaanni palasitut 2004-miilli sulilerpoq, illoqarfinnilu assigiinngitsuni arlalinni palasiusarsimalluni. Provsteqarfimmilu Kujataani 2017-imi provstinngorpoq.
