Danmarkimi kommunit qassiiusut suli matuneroqqittut

Kommunini 38-ni pingasunngornermiilli annertusisamik killilersuisoqalerpoq. Tamannalu kommuninut allanut tallimanngornermi danskit nalunaaqutaat malillugu ualikkut sisamanit atuutilissaaq.

Peqqissutsimut ministeri, Magnus Heunicke (S) Københavnimi tusagassiortunik sisamanngornermi katersortitsinermi oqarpoq.

- Sumiiffiit inunnik qanilliffiusartut virusillu tuniluuffigisartagai annikillisariaqarpagut. Inuiaqatigiinni sammisassanik atorunnaarsitsissaagut. Periarfissaappallu: Angerlarsimaannarit.

AAMMA ATUARUK Danmarkimi juulli ukiortaarlu: Inuit amerlanerpaamik qulit qerlutuutoqatigiillutillu qummoroortaqatigiissinnaasut

Matusineq 5. klassimiit qummut atuartut angerlartitaallutik qarasaasiaq atorlugu atuartinneqalernissaanik ilaatigut ilaqarpoq.

Imerniartarfiit, sutorniartarfiit neriniartarfiillu aamma matoqqapput. Annissassanillu tuniniaasoqarsinnaavoq.

Isiginnaartitsisarfiit, filmertarfiit assigisaallu aamma matoqqatinneqassapput. Tamanna naluttarfinnut, timigissartarfinnut, timersortarfinnut, katersugaasivinnut, atuakkanik atorniartarfinnut unnukkullu atuartitsivinnut aamma atuuppoq.

Synuuffuut timersornermik peqatigiiffinnullu tunngasunik suliaqarfiusut illup iluani allanit iserfigineqarsinnaatinnagit ingerlanneqassapput.

Pisortat suliffeqarfiisa sulisutit inuiaqatigiinni pingaaruteqartumik suliaqanngitsut angerlartissagaat kaammattuutigineqarpoq. Tamatuma saniatigut sulisitsisut namminersortut, sulisutit angerlarsimaffimmit sulisinnaasut angerlarsimaffiannit sulisissagaat aamma kaammattuutigineqarpoq.

Kommunini matusineq maanna januaarip ulluisa pingajuannut atuuppoq.

Coronamik tunillatsissimasutut sisamanngornermi nalunaarsorneqartut 3132-upput.

Kommunit uku maanna matooriffiunngikkunik ilaatigut matooriffiungajalerput:

- Nunap immikkoortuani Sjællandimi kommunit tamarmik

- Nunap immikkoortuani Midtjyllandimi kommunit tamarmik

- Aalborg

- Fredericia

- Vejle

- Middelfart