Danmarkimi kommunit Kalaallit ilisimanerusariaqarpaat

Folketingip isumaginninnermut ataatsimiititaliaani siulittaasoq, Dansk Folkepartimeersoq Martin Henriksen, qanittukkut oqarpoq, isumaginninnermut naalakkersuisoq, Benedikte Kiær, saaffiginiarlugu, kalaallit Danmarkimiittut pisortat sullissiviini immikkoortinneqartarnerat unitsinneqaqqullugu.

- Kisianni pissutsit qanoq ittuuneri ilisimareerpavut, massakkununa iliuuseqarnissaq pisariaqartikkipput, Sara Olsvig oqarpoq.

Immikkut suliniutinut satspuljenik taaneqartartunik Folketingip aningaasanut inatsisaani immikkoortitsisoqartarmat, ajornartorsiutit Dansk Folkepartimi ilisimaneqarsimassagaluartut,  Sara Olsvig isumaqarpoq.
Taakkunanngami pissarsinikkut kalaallinut Danmarkimi ajornartorsiortunut ikiuiniarluni suliniuterpassuit aallartinneqartarput.
Tassalu tamanna ajornartorsiutip qiterigaa, qinigassanngortittoq IA-meersoq isumaqarpoq.

- Iliuutsit suliniutillu assigiinngitsut kalaallinut tunngasut ukiumiit ukiumut taamaallaat pilersaarusiorsinnaasarput, ukiullu tullissaani aningaasassaqassanerlutik nalusarpaat. Taamaattumik suliniutut siunissaq qulakkerlugu ingerlassappata, kalaallinut ajornartorsiortunut suniliarnerup aningaasalersorneqarnera Folketingip aningasanut inatsisaani ilanngunneqartariaqarpoq, Sara Olsvig oqarpoq.

Tassalu aningaasanut inatsimmi aninmgaasaliissutit taakkua iliuusissatut pilersaarummut atorneqassasut, Sara Olsvig isumaqarpoq.
Pilersaarummi sumik imaqassava?
Siullermik kalaallit Naalagaaffeqatigiinni inuiaanerat immikkuullarissuusut akuerineqartariaqartoq, Sara Olsvig isumaqarpoq.
- Kalaallit Danmarkimut pigaangamik pappialakkut danskisut innuttaasuseqaraluarlutik, kulturimikkut, kinaassutsimikkut oqaatsimikkullu qallunaaniit allaanerungaatsiarput. Taamaattumik suliniuteqartoqaraangat iliuuseqartoqaraangallu, allaanerussutit tamakkua suliniummi ikorfartuinermilu ilanngunneqartariaqarput, Sara Olsvig oqarpoq.

Folketingimut kingusinnerpaamik novembaimi qinersisoqassaaq.