Danmarkimi killilersuutit tamarmik septembarip qulinganiit atorunnaalersut
Danmarkimi covid-19 inuiaqatigiinnut aarlerinartorsiortitsisutut septembarip qulinganinngaaniit isigineqarunnaassaaq, killilersuutillu tamarmik atorunnaarsinneqassallutik.
Peqqissutsimut ministereqarfimmiit taama paasissutissiipput.
- Tuniluunneq aqunneqarsinnaanngorpoq, akiuussuserneqarsimasuullu aatsaat taama amerlatigalutik, danskit peqqissutsimut naalakkersuisuat, Magnus Heunicke, tusagassiutinut nalunaarpoq.
- Taamaattumillu septembarip qulinga aallarnerfigalugu, covid-19-mut akiuiniaqqaalernermi killilersuutit atuutinneqalersut atorunnaasapput.
- Danmarkimi naalakkersuisut pisariaqanngitsumik killilersuisoqarnissaanik neriorsuuteqarnikuupput, tamannalu maanna atuutilerput. Massakkulli inissisimaffigissaaraluarluta suli tuniluuttoqarpoq.
- Inuiaqatigiinni pingaarutillimmik inissisimasut nappaammit tuniluuttumit eqqornerlunneqassagaluarpata, Danmarkimi naalakkersuisunit iliuuseqarfigineqapallakkumaarput, ministeri oqarpoq.
Akiuussuserneqarlutik kapitittorpassuit
Covid-19 inuiaqatigiinnut aarlerinartorsiortitsisutut suli isigineqarnera, Folketingimi partiit arlaqartut isornartorsiorpaat.
Inuppassuit akiuussuserneqarlutik kapitereersimalernerat, nappaamillu peruluuteqarlutik unitsitaasimasut isumagineqarluarnerat, partiinit arlaqartunit tunngavilersuutigineqarpoq.
AAMMA ATUARUK Kalaallit savalimmiormiullu Danmarkimi sukkanerusumik akiuussuserneqarsinnaanngortut
Folketingip nappaalasoqarneranut ataatsimiitsitaliaata covid-19 inuiaqatigiinnut aarlerinartuuneranik martsip qulinganiit nalunaaruteqarnera, septembarip qulingani atorunnaassaaq.
Ataatsimiititaliap taassumap taanna pillugu tallimanngornermi ataatsimiittussaagaluarput.
Coronapas atorunnaarpoq
Danmarkimi nunarsuullu ilarujussuani corona siorna ajornartortitsileruttormat, katerisimasussaatitaanermut coronapaseqartussaatitaanermullu killilersuisoqalerpoq.
Septembarip aallaqqaataani killilersuuterpaaluit atorunnaarsinneqarnissaat pilersaarutaavoq - taamaattumillu neriniartarfinni imerniartarfinnilu coronapaseqartussaatitaaneq atuukkunnaasalluni - diskotekilli coronapaseqartunut ammarlutik.
Septembari qulinganiit diskotekini arsaattarfissuarnilu coronapaseqarnissaq pisariaqarunnaartoq Danmarkimi naalakkersuisut tallimanngornermi nalunaarutigaat.
Septembarip qulingani, ukiut ataaseq affarlu qaangiutissapput, Danmarki coronap kingunerisaanik matuneqarneraniit.