Danmarkimi Kalaallit meerartaat kiserliortuullutik inuupput
Danmarkimi kalaallit meerartaannut inuuneq oqitsuinnaanngilaq.
Angajoqqaatik kisermaajusut, inuttut ajornartorsiuteqarneq, imaluunniit aapparisamit persuttarneqartarneq pissutigalugit kalaallit meerartaat angajoqqaartik kisermaaq ilagalugu Danmarkimut tikikkajupput.
- Inersimasut kiserliortuullutik atugarliorlutillu inuuneqartarput, taamaattumillu meeqqat Danmarkimi pisutsinut pulatinneqarnissaminnut ikiornissaqarneq ajorput, taama oqarpoq peqatigiiffimmi Kalaallit Meerartaanni allattaanerup tullia Sissel Lea Nielsen.
- Meeqqat atuarnerminnik paarsinerluttarput. Allersaasutut inissisimasarput atugarliornerallu paasineqaneq ajorluni, taanna oqarpoq.
Peqatigiiffiup Kalaallit Meerartaasa 2007-imiilli nuna tamakkerlugu suliniut "Et godt liv i Danmark", illoqarfiit annersaanni tallimaasuni kalaallit meerartaannik sumiginnakkanik 120-nut sammitinneqartoq ingerlassimavaat.
Meeqqanit 120-iusunit 20-t maannakkut angerlarsimaffiup avataanut inissinneqarsimapput. Sinneruttui ilagisaminnut utertinneqareersimapput allalli katsorsarneqarnissaminnik pisariaqartitsivallaarlutik.
Suliniummi ersersinneqarpoq, meeqqat angerlarsimaffiup avataanut inissinneqarsimasut pingasuugaangata marluk isumaginnittoqarfinniit paarineqalerneq ajortut.
- Suliniummittaaq ersersinneqarpoq, meeqqat allaat ima atugarliortigisartut, pisuni amerlanerpaani isumaginnittoqarfiup attavigineqarnissaa pisariaqalersarluni.
Taamaattoqarneratalumi kinguneranik takutinneqartarpoq, meeqqat sumiginnagaasimasut mattussaasutut misigisimaneranniit aniguisinneqartarnerat, taanna oqarpoq.
Meeqqallumi 92 procentiisa nammineq pitsaanerusumik inuuneqalersimanertik misigisaraat misissuinermi takutinneqarpoq.
Christiansborgimi Danmarkimi meeqqat atugarisaat aqagu oqallisigineqalerpata peqatigiiffik tusarniaatitsiniarpoq.
Enhedslistenii isumaginninnikut oqaaseqartartartup, Eyvind Vesselbo-p, Akulerutsitsinissamut ministerimut Karen Hækkerupimut, kalaallit meerartaannut suliniarnerup aningaasanut inatsimmut ilanngunneqarnissaat tamanna tunngavigalugu kammattuutigaa.
Folketingemi Isumaginninnermi ataatsimiititaliap siulittaasup, Özlem Cekicip nuna tamakkerlugu ataqatigiissumik siumullu isigisumik pilersaarusiortoqarnissaa piumasaraa.
---
