Danmarkimi kalaallit ilageeqalernissaat politikkikkut taperserneqartoq
Taama pisoqarpoq kalaallit Danmarkimi ilageeqalernissaat pillugu suleqatigiiffik isummereersorlu Kirkeministeria suliamut suliniutikippallaartoq.
- Pissutissaqavissumik kissaataavoq, kalaallimmi Danmarkimi najugaqartut amerlasoorujussuupput, pingaaruteqarporlu tamakku ilagiinni kalaallisut sullinneqarnissaat.
Danmarkimi ilageeqarnermut ministereqarfimmut atasumik kalaallit ilageeqalernissaat pillugu suleqatigiiffik ataatsimeeqatigereerlugu Vestret oqaaseqartartuat Flemming Damgaard Larsen taama oqarpoq.
Ministerip sulinera kigaappallaasorineqarpoq
Suliarli arritsuinnarmik ingerlanneqarpoq. Peqatigiiffiup ilagiit kalaallit Danmarkimi arlalinnik palaseqarlutik ingerlalernissaanik kissaateqartup siorna septemparimi danskit kulturimut ministeriannut Marianne Jelvedimut siunnersuut saqqummiuppaa.
Tassani akineqarput ministerip suliaq misissorumaaraa, kingornali pisoqaqqissimanngilaq.
Taarsiullugu suleqatigiiffik ministerip parteeqataanut tapersersorneqarusulluni saaffiginnippoq, Radikalit ilageeqarneq pillugu oqaaseqartartuannut Helle Løvgreen Mølvigimut, venstrellu oqaaseqartartuannut.
Taperserneqarpullumi:
Venstreneersup Flemming Damgaard Larsenip ilageeqarnermut ministeri Marianne Jelved Folketingimi suliaq ingerlateqqinniarneraa pillugu apeqquteqarfiginiarpaa.
- Suliap ingerlateqqinnissaanut periarfissaqarpoq Ilageeqarnermut inatsimmi paragraf fem naapertorlugu. Tassani ministeri ilagiit sinniisaannik pilersitsinissaminut periarfissaqarpoq. Pissutissaqavissuummat soorunami ministerimut tamanna kissaatigissavara venstret oqaaseqartartuat oqarpoq.
Danmarkimi kalaallit palasit ullumikkut marluupput
Danmarkimi ullumikkut kalaallinik marlunnik palaseqarpoq. Aappaa Namminersorlutik Oqartussanit atorfinitsitaavoq, namminerlu piumassuserinngisaminnik Danmarkimiittunik sullissisuulluni, soorlu napparsimmavinni parnaarussivinnilu.
Aappa Aarhusimi atorfeqarluni ilagiinnik kalaallinik Danmarkimi tamarmi sullissisuuvoq.
Taamaaliortoqarpoq naak palasi ataaseq danskenik 2.500-nik sullissisaraluartoq. Sanilliunneqarsinnaavoq, palasit marluk kalaallinik kinguaavinnillu Danmarkimiittunik 25.000-nik sullissimmata.
