Danmarkimi kalaallit angerlarsimaffeqanngitsut ukiorlussiorput
Isumaginninnermut siunnersuisarfik Pooq, Københavnimi kalaallit illuutaanniittoq juulleriartornerani ukiutoqariartorneranilu kalaallinit ikiorneqarnissamik siunnersorneqarnissamilluunniit pisariaqartitisisunit saaffigineqarluarpoq, saaffiginnissutillu tassaanerussimapput angerlarsernermut imaluunniit juullisioqatissaqannginnermut tunnganerusut. Kisiannili aamma kalaaleqarpoq pisortanut imaluunniit kalaallit illuutaannut siunnersorneqarnissamik ikiorserneqarnissamilluunniit saaffiginninngisaannartunik. Taama oqarpoq Kalaallit illuutaanni Københavnimiittumi ningiu, Inger Bruun.
Isumaginninnermut siunnersuisarfik Pooq ukiumut naliginnaasumik inunnit 300-t missaanniittunit assigiinngitsunik peqquteqarluni saaffigineqartarpoq - saaffiginnittartullu tassaanerusarput Danmarkimi pisortat ingerlataannut pissutsinik ilisimaarinninnerusut. Kalaallilli angerlarsimaffeqanngitsut amerlasuut ikiorserneqarnissartik pillugu saaffiginninngisaannarput, Danmarkimi sumut saaffiginissallutik ilismaneq ajoramikku - massakkullu ukiorlulluni issinnerujussua pissutigalugu taakku inuuniarnikkut atugaat suli oqimaannerulertut, Inger Bruunip oqaatigaa.
- Massakkut Danmarkimi issittorujussuuvoq angerlarsimaffeqanngitsunullu inuuneq artornartorujussuuvoq. Qujanartumilli arlaqartut inissarsissunnikuuagut imaluunnit angerlarsimaffeqanngitsut unnuisarfiinut inissittarlutigit. Qaammatinili makkunani angerlarsimaffeqanngitsunut inissiisarfinni unnuiffissarsinissaq ajornakusoortorujussuuvoq. Massakkut aqqusiinnarni najugaqartoqarpoq opganginilu ilaatigut kissassimaarfissarsiortarput, Inger Bruun oqarpoq.
Taassuma aamma oqaatigaa kalaallit angerlarsimaffeqanngitsut arlaqartut kommuunini inunnut allattorsimaffinni ilaaneq ajormata kalaallit illuutaanniit ikiorsernissaat ajornakusoortorujussuusartoq, taamaattorli aqqusinermi angerlarsimaffeqanngitsunut sullissisut ujaasillutik kalaallit angerlarsimaffeqanngitsut nanisaraat sumilu ikiorserneqarsinnaanerannik ilisimatittarlugit.
- Inuit taakku pineqartut ajorluinnartumik inissisimapput. Isumaqarpungalu inunnik allanik ilisarisimasaqannginnamik, sumilu ikiornerserneqarnissartik ilisimannginnamikku kiserliortorujussuusartut. Allatulli iliorsinnaanngilagut kisianni aqqusinermi ujarlutigit, Inger Bruun oqarpoq.
