Danmarkimi kalaallit angerlarsimaffeqanngitsut 350-it missaanniipput

Danmarkimi angerlarsimaffeqanngitsut 6 procentii Nunatsinneersuupput. Isumaginninnikkut ilisimatusarfiup SFI-p Danmarkimi angerlarsimaffeqanngitsunik ukioq allortarlugu naatsorsuisartup kisitsisaataani kingullerni tamanna erserpoq.
Allattoq Martine Lind Krebs, Simon Uldum
oktobarip 29-at 2013 06:41

Misissuinermi Danmarkimi angerlarsimaffeqanngitsut akornanni kalaallit qanoq amerlatiginersut siullerpaamik naatsorsorneqarsimapput, amerlassusaammi maannamut ilisimaqqissaarneqarsimanngikkaluarpoq.

Nuna tamaat eqqarsaatigalugu kalaallit angerlarsimaffeqanngitsut Aalborgimi Københavnimilu amerlanersaapput. Aalborgimi angerlarsimaffeqanngitsut allaat 26 procentii Kalaallit Nunaanneersuupput. Københavnimi 11 procentiullutik, Aalborgimi 8 procentit Odensemilu 9 procentiullutik.

Kisitsisitigut paasissutissatigut aamma erserpoq imigassaq hashilu angerlarsimaffeqanngitsut Kalaallit Nunaaneersut akornanni atornerlunneqarnerpaajusut. Danskinut nunaqavissunut angerlarsimaffeqanngitsunut naleqqiukkaanni ikiaroornartumik ajornartorsiuteqartut ikinneerarsuupput. Danskit angerlarsimaffeqanngitsut 23 procentii ikiaroornartumik ajornartorsiuteqartuupput, kalaallillu angerlarsimaffeqanngitsut 4 procentiinnaat ikiaroornartumik ajornartorsiuteqartuullutiki.

Angerlarsimaffeqanngitsut Nunatsinneersut 2 procentiinnaat atornerluisuunerminnik imaluunniit eqqarsartaatsikkut nappaateqarnerminnik katsorsarneqarput. Danskit nunaqavissut angerlarsimaffeqanngitsut akornanni kisitsisit qaffasinnerujussuupput, 15 procentiullutik.

SFI angerlarsimaffeqanngitsunik ukiut tamaasa sapaatit akunnerani 6-imi kisitsisarpoq. Ukiormannalu kisitsisoqarnerani paasineqarpoq Danmarkimi angerlarsimaffeqanngitsut 2009-mut naleqqiullugit 16 procentinik amerleriarsimasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq