Danmarkimi kalaallisut juullimi naalagiarfissat
Hans Egedep Oqaluffiani Aalborgimiittuni Oline Berthelsen palaseralugu juulliaqqami ullaakkut nalunaaqutaq qulinut naalagiaqatigiittoqassaaq.
Kalaallit Danmarkimi palasiat, Jens-Kristian Kleist, juulliaqqami aamma marloriarluni naalaagiartitsissaaq.
Kalaallit pineqaatissinneqarsimasut Hertedsvesterimi inissinneqartarfianni ullaakkut nalunaaqutaq qulinut naalagiartitseriarluni ualikkut nalunaaqutaq ataatsimut Helligåndskirkenimi Københavnip qiterpasissuaniittumi naalagiartitseqqissalluni.
Palasi Jens-Kristian Kleist juullerujussuarmi ualikkut nalunaaqutaq marlunut taakkunani naalagiartitseqqissaaq, Rigshospitalimilu uninngasunut erinarsoqatigiit MIK-ikkut peqatigalugit kingorna pulaassalluni.
Juullimi oqariartuutigineqartut kalaallisut P1-imi aamma tusarnaarneqarsinnaassapput. Oline Berthelsenip Vor Frue Kirkernimi, Aarhusimi Juulliaqqami ualikkut naalagiartitsinera sisamanngoriitsiarnerani aallakaatinneqarumaarluni.
Juullip ulluisa aappaanni Patienthjemimi Omøgademi Københavnimiittumi ullaap tungaani nalunaaqutaq aqqanermut tanneq qulingiluanut naalagiartoqassaaq, palasi Jens-Kristian Kleist naalagiartitsisoralugu.
Taanna decembarip 27-iani Aarhusimi Risskoviliassaaq tarnimikkut napparsimasut uninngasarfiannut naalagiartitsiartorluni.
Namminersornerullutik Oqartussat kingornalu Namminersorlutik Oqartussat ukiorpanni Danmarkimi kalaallimik palaseqarnissaa aningaasaliiffigisarsimavaat, ilinniartut, nakorsiat pineqaatissinneqarsimasullu sullinneqarniassamata.
Ukiorpaalunni palasissaaleqisoqareersorlu ilagiit danskit Oline Berthelsen kalaallinut Danmarkimiittunut kingorna palasinngortippaat.
