Danmarkimi kalaallinik inuiaqatigiinnut akuulersitsiniarneq ingerlalluanngilaq

Danmarkimut nuunnermi ikiorserneqarnissaq ikiorserneqarnissamillu noqqaassuteqarnissaq ajornakusoorsinnaasarpoq. Nalunaarusiami 'Kalaallit Nunaanni qallunaajuvallaarpunga, Danmarkimilu kalaaliinnaallunga'-mi Københavnimi Kofoeds Skolemi naapittarfimmi Naapiffimmi ullumi saqqummiunneqartumi, Danmarkimi kalaallinik inuiaqatigiinnut akuulersitsiniarnermut suliniuteqarneq pitsaasuunngitsoq uppernarsarneqarpoq.

- Taamatut oqassalluni sakkortugaluarpoq, Naalagaaffeqatigiilli innuttaasut ilaannik, uatsinnut qaninnerpaatut isigineqartussaagaluartunik, tunulliutsitsisutut oqaatiginqarsinnaavoq, siunnersuisooqatigiit siulittaasuat, Jann Sjursen, taama oqarpoq.

Danmarkimi kalaallinut inooqataaniarnikkut ajornartorsiortunut suliniutit qangali ukiumit ukiumut aningaasalersugaasarsimanerat sakkortuumik aamma isornartorsiorpaa.

- Kalaallit inooqataaniarnikkut ajornartorsiortut pillugit nalunaarusiap ukiut qulit matuma siorna saqqummersineqarnerata kingorna, 20 mio. koruuninillu aningaasaliissuteqartoqarneranik kinguneqartup kingorna, taamatut inissisimasoqarnera pakatsinarpoq. Suliniutaasoq ukiuni sisamani ingerlanneqarpoq, ingerlanneqareermallu ukiuni sisamani nalilersuiffigineqarluni. 2013-mi nuna tamakkerlugu periusissamut 13,4 mio. koruuninik immikkoortitsisoqarpoq. Ingerlaavartumik suliniuteqartoqartariaqarpoq, sukkut tamaana suliniuteqaannarani, taamaaliornikkummi misilittagarpassuit annaaneqartarmata, Jann Sjursen, taama oqarpoq.

Nalunaarusiaq Danmarkimi kalaallinik inooqataaniarnikkut ajornartorsiortunik aqqaneq-marlunnik apersuisoqarsimaneranik toqqammaveqqarpoq. Mille Schiermacher, Kalaallit Illuutaanni suliniutinik ulluinnarni suliaqartuusoq aamma nalunaarusiornermi peqataasimavoq. Taanna oqarpoq ajutuuissortoqaraangat danskit oqartussaasuinit ikiorsiissuteqarneq aatsaat pisartoq.

- Inuit taakku Danmarkimut pinerminni inooqataaniarnikkut ajornartorsiuteqarnerisa annertusiartuinnartarnera ingasajussuarpallaaqaaq, sukkut tamaanaannarmi ikiuiniaannarata pitsaanerujussuarmik ikiorsinnaasariaqaraluaratsigit, Mille Schiermacher oqarpoq.

Danmarkimut aallannginnermi paasissutissanik tunniussisoqartarnissaa pingaaruteqartoq, Nunatsinni inissaaleqisoqarnera pissutigalugu amerlasuut Danmarkimut nuuttarnerat, Danmarkimilu inunnik isumaginninnermi siunnersortit Kalaallit Nunaat pillugu ilisimasakippallaarneri Danmarkimilu imigassap ikiaroornartullu akikinnerujussuat pissutigalugu nakkaannissamut qanillattortitsisarneri nalunaarusiami apersorneqartut aqqaneq-marluusut tikkuarpaat.

Nalunaarusiaq naapertorlugu kalaallit Danmarkimut nuuttut 6 aamma 20 procentiisa missaat angerlarsimaffeqanngitsutut, atornerluisutut piitsutullu inuulersarput.

Kalaallinut inooqataaniarnikkut ajornartorsiuteqartunut nuna tamakkerlugu periusissamut danskit naalakkersuisui 13,4 mio. koruuninik immikkoortitsitsimapput, suliniuteqarnerlu Danmarkimi kommunit suliniuteqartullu namminersortut ukiut sisamat atorlugit katersorniarneqassapput. 2014-imi satspuljemit aningaasaliissutissatut isumaqatigiissummi aamma Kalaallit Illuutaasa sisamaasut isumaginninnikkut suliniutaasa ataavartunngortinnissaannut 4,4 mio. koruunit immikkoortinneqarsimapput.

Danmarkimi Inooqataaniarnikkut Ajornartorsiortut pillugit Siunnersuisoqatigiit Christiansborgimi marsip tallimaani tusarniaanissamut aamma qaaqqusisimapput.