Operation Dagsværk: Danmarkimi inuusuttut nunatsinni inuusuttoqatitik ikiorniarlugit sulisut
Operation Dagsværkip suliniut Danmarkimi Røde Korsip Inuusuttunut immikkoortortaata Nunatsinnilu Røde Korsip suleqatigiissutigisaat tapersersorniarlugu ukioq manna toqqarpaa. Aningaasat katersorneqartut nunatsinni inuusuttut inooqataanikkut ajornartorsiortut ikiorserneqarnissaannik siunertanut atorneqassapput.
Ilinniarnertuunngorniat Operation Dagsværkimut peqataasut suliffeqarfinni inuinnarnilu suliffissarsiortarput, soorlu naatsiivilerinermik, eqqiaanermik, biilinik asaanermik ilinniagassanillu ikiuinermik assigisaanillu.
19-inik ukiulik Nadja Lausen aamma 18-inik ukiulik Marie Louise Gammelgaard Odense Katedralskolemi ilinniartuupput, taakkulu ilinniarfitsik qimalaarlugu Oure Efterskolemut, Odensemit kilometerinik 50-inik ungasitsigisumiittumut suliartorput.
Atuakkatik qimallugit ullumikkut asaasussaapput, Oure Efterskolemimi kantiinami pingasunngornikkut eqqiaasoqartarpoq, nivissallu suliassatik ingerlaannaq aallartippaat.
AAMMA ATUARUK Ilinniarnertuunngorniarfinni ilinniartut kalaallit inuusuttaat pillugit sulisut
Kalaallit Nunaanni inuusuttut ikiorsinnaallugit paasisaqarfiginerusinnaallugillu assut nuannerpoq
- Ukioq manna suliniutigineqartoq assut pikkugaara, isumaqarama kalaallit inuusuttut pillugit ilisimasakippallaartugut, tamannalu immaqa ajornartorsiutaasutut taaneqarsinnaagunarpoq. Suliniullu manna aqqutigalugu immaqa paasissutissiisoqarsinnaavoq, peqatigisaanillu tapersersuisoqarluni. Taamatullu periarfissinneqarnera assut torragivara, Nadja Lausen oqarpoq.
Ilinniartut Operation Dagsværk pillugu, aningaasallu Kalaallit Nunaannut tunniunneqarnissaannut siunertarineqartoq pillugu ilinniarfimminni immikkut sammisaqartinneqarsimapput:
- Tassani paasisaqarneruvugut. Qanoq tapersuisinnaanersugut, kiisalu aamma Operation Dagsværkip, torrattupilussuusup, tapersersornissaa qanoq pingaaruteqartiginersoq paasivarput, Marie Louise Gammelgaard oqarpoq.
Danmarkimi ilinniartut Operation Dagsværkimi sulisut saniatigut aamma Nuummi GU-mi ilinniartut suliniummut aningaasanik katersuiniarput.
Nunami katersuiniunneqartumi inuusuttunik suliummut siullerpaamik peqataatitsisoqarpoq.
