Danmarkimi inuit marluk coronavirus pissutigalugu pinngitsaaliissummik mattunneqartut

Napparsimasut isumannaatsuunissaat pillugu aqutsisoqarfik nittartakkamini taama allappoq. Innuttaasut marluk mattunneqarnissaat politiit ikiortigineratigut pisimasoq tassani allassimavoq.

Tamanna Folketingip marsip ulluisa aqqaneq-aappaanni inatsimmik nukingisaarutaasumik atulersitsisimanerat pissutigalugu taama iliortoqarsinnaasimavoq.

Inatsisip coronamik tunillatsissimasut tunillatsissimasutullu pasitsaanneqartut napparsimmavimmut pinngitsaaliissummik unitsinneqarnissaannut, katsorsarneqarnissaannut mattunneqarnissaannullu peqqinnissamut oqartussat pisinnaatippai.

Tamannalu maannamut marloriarluni atorneqarpoq.

AAMMA ATUARUK Danskit naalakkersuisuisa coronavirusi unitsinniarlugu killeqarfiit matugaat

- Aqutsisoqarfiup inassut taanna pisimani marlunni atorpaa. Pisuni marlunni innuttaasup mattunneqarnissaanut aalajangiineq pineqarpoq.

- Pisini taakkunani marlunni aqutsisoqarfik politiinit ikiorneqarluni inassummik atuivoq, Napparsimasut isumannaatsuunissaat pillugu aqutsisoqarfik tusagassiuutinut nalunaarummi allappoq.

Aqutsisoqarfiup ”Covid-19-imik tuniluuttoqarnissaanut pinaveersaartitsinermi pinngitsaaliinissa” kisimi inassutigineqarsinnaasoq nalunaarummini allappaa.

Aammattaaq inassut taanna ”annikinnerusumik akuliunnermut” sakkussat tuniluuttoqarnissaata aarlerinarneranut annikillisaaniarnermi naammanngippata aatsaat atorneqarsinnaasoq allassimavoq.

Pisinnaatitsillutit nutaat marsip ulluisa 18-ianni atuutilermatali marloriarlugit atorneqarsimasut Napparsimasut Isumannaatsuunissaat pillugu aqutsisoqarfiup sapaatip-akunnerata siuliani paasissutissiissutigaa.

Aqutsisoqarfiup sapaatip-akunnerata siuliani nalunaarummi paragraffit sorliit atorneqarsimanersut piffissami tassani ilisimatitsissutigerusunngilaa. Tassa imaappoq tamanna mattussinerunersoq, katsorsaanerunersoq misissuinerunersorluunniit ilisimatitsissutiginagu.

AAMMA ATUARUK Oqartussat pinngitsaaliissummik katsorsaasinnaalersut

Aviisittaaq politiit akuliutsinneqartariaqarsimanersut aamma akissusersisinnaasimanagu. Matumani suliat inunnut ataasiakkaanut tunnganerat pissutaasoq, Napparsimasut isumannaatsuunissaat pillugu aqutsisoqarfiup oqaatigaa.

Folketingimili peqqinnissaq pillugu oqaaseqartartut qassiiusut peqqinnissamut ministerimit, Magnus Heunickemit (S) nalunaajaasoqarnissaanik noqqaassuteqarput.

Oqartussat inatsisinit nukingisaarutaasunik atuukkallartunik nutaanik atuinerannik ammasoqarnerusoqarnissaa partiit ujartorpaat.

- Ministerimut annertuumik piginnaatitsissummik akuersissuteqarsimanitsinni inatsisip taassuma qanoq atorneqarnera qanorlu atorneqartiginera malinnaaffigissallugu soqutigaarput, Enhedslistenip peqqinnissaq pillugu oqaaseqartartua, Peder Hvelplund Jyllands-Postenimut oqarpoq.

/ritzau/