Danskit naalakkersuisuisa coronavirusi unitsinniarlugu killeqarfiit matugaat
Danskit killeqarfiit arfininngornermi nalunaaqutaq 12.00-imit matuneqarallassasut, ministeriuneq, Mette Frederiksen (S) tusagassiortunik katersortitsinermi oqarpoq.
Matusisoqarnera killeqarfinni nakkutilliisoqalernissaanik isumaqarpoq. Tamanna poorskip kingornata tungaanut tassa apriilip 13-iata tungaanut atuutissaaq.
Coronavirusip tuniluunnerata annikillisinnera pissutigalugu taama iliortoqarpoq.
- Takornariat nunamilu allamiut Danmarkimut pissutissaqavinnatik iserniartut isersinnaatinneqassanngillat. Danskit Danmarkimut iserniartut isersinnaajuaannassapput, Mette Frederiksen oqarpoq.
Killeqarfinni nakkutilliineq tamakkiisoq ullualuit qaangiuppata aatsaat atorlualissaaq.
AAMMA ATUARUK Coronavirusimik Danmarkimi tunillanneqarsimasut maanna 785-iusut
Tamannalu nunatsinnut qanorpiaq isumaqarnersoq, Tunillaassortunik nappaalasoqarneranut ataatsimiititaliarsuup tallimanngornermi ualikkut akissuteqarfigisinnaanngilaa:
- Danskit killeqarfiinik matusineq nunatsinnut qanoq isumaqarnersoq oqaatigissallugu siusippallaarpoq, Kalaallit Nunaanni politiit mailikkut akissuteqarput.
- Sapaatip-akunnerata tulliani paasisaqarnerugutta tamanna uterfigeqqissavarput.
Biilit siuleriiaattut mittarfinnilu utaqqisut siuleriiaattut
Politiit Illersornissaqarfillu killeqarfinni nakkutilliisuussapput.
Danskisut innuttaassusillit killeqarfitsigoorsinnaassapput, inuussutissallu nakorsaatillu aamma assartorneqarsinnaallutik.
Inatsiseqarnermut ministerip, Nick Hækkerupip (S) killeqarfinni nakkutiginninneq killeqarfinni, mittarfinni ukaartaatillu tulattarfiini atuutissaaq.
- Killeqarfiit tungaanut biilinik siuleriiaattoqarnissaa naatsorsuutigaarput. Mittarfinni siuleriiaattoqassaq. Aamma qimuttuitsut, timmisartut ikaartaatillu aqqutaasa ilaannik matusisoqarnissaa takussagunarparput, Nick Hækkerup oqarpoq.
Naalagaaffiup politiivisa pisortaat, Thorkild Fogde tusagassiortunik katersortitsinermi peqataasoq suliniutit nutaat pillugit oqarpoq:
- Danmarkip pingaartumik Tysklandimut, Sverigemut killeqarfii Norgemullu killeqarfia annikitsumik pineqarput. Sukaterivugut, Thorkild Fogde oqarpoq.
Inuinnaat killeqarfitsigoorsinnaanerat politiit arfininngornermi matuniarpaat, oqimaatsunilli assartuinerit ingerlasinnaatillugit.
