Danmarkimi ilinnialernissamut neqeroorfigineqarpit? Taava aggustip aappaatinnagu akuersissaatit

Danmarkimi ilinnialernissamut neqeroorfigineqartorpassuupput. Danmarkimi inuti 67.425-t ilinniarfinnut ingerlaqqiffiusuni ilinnialernissaminnut akuerineqarsimapput.

Nunatsinnit Danmarkimi ilinnialernissamut qinnuteqartut aamma taakkununnga ilaapput.

Taamaammat ilinniarfigerusutannut qinnuteqarsimaguit taava ilinnialernissamut akuersinissaq eqqaamassavat.

Ilinnialernissamummi akuersinissamut killiliussamik ulloqarpoq.

Akuersinissannut kingusinnerpaamik aggustip ulluisa aallaqqaat nalunaaqutaq 23.59 periarfissarivat.

Ilinnialernissamut akuersiniaruit e-boksit alakkassavat, allagarsiamilu linki iserfissaq aqqutigalugu ilinniarfissamut akuersillutit. Piffissaliussaq eqqorlugu akuersinngikkaanni ilinnialerneq aallartinneqarsinnaanngilaq.

Aammattaaq e-boks aqqutigalugu qinnuteqaammik itigartinneqarnerluni paasineqarsinnaavoq.

Københavnimi Kalaallit Illuutaat naapertorlugu nunatsinnit 15-it Danmarkimi ilinnialernissamut maannamut akuersereersimapput.

Ukioq manna qinnuteqaammik akuerineqartut pillugit kisitsisit uani ataani takusinnaavatit:

- 67.425-t ilinniarfinni ingerlariaqqiffiusuni ilinnialernissamut qinnuteqartut juulip ulluisa 28-anni neqeroorfigineqarput. Taakku akuerineqarnikuusimasunit amerlanerpaat tulleraat. Siorna akuerineqartut amerlanerpaasimapput, tassanilu 69.529-t akuerineqarlutik.

- Qinnuteqartut piukkunnaateqartut 80 procentiisa siullertut kissaatigisartik ilinnialerfissatut akuersissuteqarfigaat. Tassa qinnuteqartut tallimaagunik sisamat akuerineqarput.

- Ukioq manna qinnuteqartut katillugit 93.388-iupput.

- Qinnuteqartut 11.188-t ilinniarfissamut piukkunnaateqartut kissaatigisartik malillugu akuersissuteqarfigineqanngillat.

- Qinnuteqartut 9559-it ilinnialernissamut piumasaqaatinik naammassinnissimannginnertik piukkunnaateqannginnertillu pissutigalugu itigartitsissuteqarfigineqarput.

- Inuussutissarsiutigalugu ilinniarfinni 11.587-it akuerineqarput, professionsbacheloritut ilinniarfinni 26.672-it akuerineqarput bacheloritullu ilinniarfinni 29.166-it akuerineqarlutik.

Paasissutissarsiffik: Ilinniartitaanermut Ilisimatusarnermullu Aqutsisoqarfik.