Danmarkimi coronavirusimik tunillatsissimasutut siumorneqartut 1468-iusut - tunillatsissimasut akornanni qulingiluat toqusimasut
Danmarkimi coronavirusimik nalunaaquttap akunneri 24-t kingulliit ingerlanerannni tunillatsissimasutut siumorneqartut 1468-iupput.
Naalagaaffiup Nappaatinut Akiuussutissaliorfia, Statens Serum Institut, taama ilimatitsivoq.
Naalagaaffiup Nappaatinut Akiuussutissaliorfiata coronavirus tuniluutilermalli ullup unnuallu ingerlaneranni tunillatsissimasut aatsaat taama amerlatigisut siumorpai.
Inuit 71.322-t ippassaq ataasinngornermi ullumilu marlunngornermi misissorneqarsimasut nalunaarutigineqarpoq.
AAMMA ATUARUK Seruminstituttip coronamik tunillatsissimasut sapaatit akunnerini tulliuttuni marlunni amerlissangatikkai
Misissorneqartut 2,06 procentii tunillatsissimasutut paasineqarput, sapaatip-akunnerisa kingulliit ingerlaneranni aatsaat taama amerlatigalutik.
Coronavirusimik napparsimallutik napparsimmavinni uninngasut maanna 254-iupput, ataasinngornermiit tallimanik ikilisimallutik.
Coronavirusimik tunillatsissimasut akornanni qulingiluat ullup unnuallu ingerlaneranni toqusimapput.
Pingaartumik Københavnip nalaani killilersuinerit sukateriffigineqarnissaat Danmarkimi naalakkersuisut nunatta nalunaaqutaa ullup-qeqqanut saqqummiuppaat. Coronavirusimi Københavnip nalaani tuniluuttorujussuuvoq, pingaartumik inuusuttut akornanni.
