Danmarkimi coronavirusimik toqquteqartut qulingiluanik amerlisut - unitsinneqartut ikinnerusut

Danmarkimi coronamik tunillatsissimanermi kingonr toqusut 443-pput.

Statens Serum Instituttip naatsorsuinerata nutaap, pingasunngornermi marlunut saqqummersinneqartup tamanna takutippaa. Toqusut amerlassusaat marlunngornermit quliniluanik ilapput.

Coronamilli tunillatsissimallutik toqusut ilumut nappaat taanna toqqutigineraat qularnarpoq. Coronamik tunillatsissimasutut paasineqarnermi kingorna ullut 60-inngortinnagit toqusut naatsorsuinermut ilaatinneqartarput.

Coronavirusimik tunillatsissimasut napparsimmavimmi uninngasut 284-init 267-inut ikilipput.

Unitsinneqarsimasut amerlassusaat marlunngornermi pingasunngornermilu ikilipput, taakku sapaammi ataasinngornermilu 25-nik amerlisimagaluarput.

AAMMA ATUARUK Savalimmiut: Coronamik tunillatsinnikuusimasut napparsimaleqqittut

Napparsimmavimmi uninngasunit marlunngornermitulli 66-it peruluttut uninngavianniipput, 50-illu aamma marlunngornermitulli anersaartuuteqartinneqarlutik.

Napparsimmavinni uninngasut amerlanerpaartaat nunap immikkoortuani illoqarfiit pingaarnersaanniipput, tassani 150-it uninngapput. Nunap immikkoortuanut Nordjyllandimut sanilliukkaanni tassani uninngasut quliupput, tassanilu unitsinneqarsimasut Danmarkimi nunap immikkoortuinit tallimanit ikinnerpaallutik.

Napparsimmavimmut unitsinneqartut apriilip ulluisa aallaqqaataanni 535-ullutik amerlanerpaagamilli ikiliartorput.

Danmarkimi inuit 180.000-init amerlanerusut coronavirusimut misissorneqarnikuupput. Oqartussat periutsimik tassa ersiuteqartut tamarmik misissorneqartarnissaannik periuseqalernerata kingunerisaanik ullormut misissorneqartartut amerliartulerput.

Danmarkimi coronavirusimik tunillatsissimasut katillugit 9008-it paasineqarnikuupput. Taakkunanngalu 6366-it qaangiisimasutut nalunaarsoqqallutik.

AAMMA ATUARUK Tamaat isigalugu: Coronavirus pillugu killiffik

Danskit oqartussaasuisa peqqisseqqittunik taaguinngillat. Nappaammik qaangiisimaneq isumaqarpoq tunillatsissimanermit ullut 14-it ingerlaneranni napparsimmavimmut unitsinneqarsimanngitsut toqusimanngitsullu.

Danmarkimi coronavirusimik tunillatsissimasunit toqusut 4,9 procentiupput.

Danmarkimi tunillatsissimallutik uppernarsarneqanngitsut amerlanerungaatsiassangatinneqarput, taamaammat nappaatip toqussutigineqartarneranut procenti appasinnerussangatinneqarpoq.

/ritzau/