Danmarki 84-eria angerpoq
Angerlarsimaffinni annersaanermik atuineq akiorneqarli. Meeqqanik akissarsiutigalugu atortitsisarnerneq pinngitsaaliillunilu inunnik niueruteqartarneq pillugit isumaqatigiissutinik atuilersitsisoqarli, nunattalu silaannaani CIA-p unioqqutitsilluni timmisartuussisarnerisa kinguneri nalilersorneqarlik.
Tamakkuupput innersuussutit ilaat nunatsinnut tunngasut, maajip aallartisimalaarnerani Danmarki inuttut pisinnaatitaaffiit pillugit misilitsimmat.
UPR-mik taasaq, Universal Periodiv Reviewimik allassimasup nunat 47-t innersuussutit 133-it Danmarkimut saqqummiuppaat inuttut pisinnaatitaaffiit atajuarnissaat qularnaarniarlugu. Naliginnaasumik nunat angernersut naaggaarnersulluunniit ullunik marlunnik akinissaminut periarfissinneqartarput, Danmarkili akissutissartik kingusinaartumik tunniunnissaanut qinnuteqarsimapput.
Juulillu aallartinnerani Nunanut Allanut Ministereqarfiup akissutini nassiuppai. Katillugit angertut 84-iupput. Taamaattumik Danmarki pisussanngorpoq innersuussutit 84-it malinnissai, tullissaanilu 2015-mi UPR-ip ingerlatsilerpat akisussaaffilerneqassallutik.
- Danmarkip innersuussutit akuerisaasut ilumooruppaat, taakkuli nanginneqaqqinnissaanut inuiaqatigiillu oqaloqatigiinnissarput qilanaaralutigu, tusagassiutinut nalunaarummini Nunanut Allanut Ministeriaqarfik allappoq.
Kalaallit Nunaani angerlarsimaffinni persuttasoqartarneranut iliuuseqarniarlutik Naalagaaffeqatigiit akissumminni imminnut pisussaaffilerput. Aamma akiliilluni meeqqanik atoqateqartarneq pillugu FN-imi isumaqatigiissut, akilersillugullu atortittartunik pinngitsaaliilluni inunnik niueruteqartarneq pillugu FN-imi isumaqatigiissutit, Kalaallit Nunaanni Savalimmiunilu atuutilissanersut misissorneqassapput.
Apeqqulli ataaseq pillugu danskit nalakkersuisui malartaaserput: CIA-p timmisartuisa Nunatta silaannartaatigoortarsimaneri pillugu annerusumik misissuisoqassanngitsoq, akissummi tunngavilersorneqanngitsumik allassimavoq.
Inuttut pisinnaatitaaffiit pillugit ilisimatusarfimmeersut kattuffiillu naalakkersuisunut attuumassuteqanngitsut arlallit akissummut pakatsisimaarput.
- Qanoq iliuuseqarniartoqarneranik ersittoqanngilaq, tamannalu pakatsinarpoq. Neriukkaluaratta, FN-imit misilitsinneq atorneqassasoq, inunnut pisinnaatitaaffimmikkut pisortanit arlaatigut ajornartorsiortinneqartunut, naalakkersuisut aaqqiiniarnerat annertusissasoq, imaluunniit malittarisassat pisinnaatitaaffiilluunniit ersernerluttut ersarissarneqassasut, Inuttut pisinnaatitaaffiit pillugit ilisimatusarfimmi inatsisileritooq Christoffer Badse oqarpoq.
FN-ip inassutaanit 133- jusunit danskit akuerisaasa 84-t qanoq naammassiartornerqarnerat, qanoq ingerlanersoq piffissap qiteqqunnerani 2013-imi nalunaarusiornerqassasoq, Danskit nunanut allanut tunngasunut ministereqarfiat ilisimatitsivoq.
