Danmark puisinniartarneq pillugu paasititsiniaaniarpoq
Puisinniarneq inuussutissarsiutitut naalakkersuisunit qanoq isigineqarnersoq Sara Olsvigip ilaatigut apeqqutigaa, kalaallillu ameerniutaasa ussassaarutigineqarnissaanik qallunaat iliuuseqarniarnersut apeqqutigalugu.
Kalaallit puisinniartarnerat Danmarkimit tapersersorneqartoq, Villy Søvndalip akissummini erseqqissarpaa, aamma oqarluni ilanngaaserisunut, inuussutissarsiortut kattuffiinut, soqutigisaqaqatigiinnullu assigiinngitsunut paasisitsiniutigineqarnissaa ilaatigut peqataaffiginiaritsik.
Kalaallit nungusaataanngitsumik puisinniartarnerannik ilisimasaqarnerulernissaq qallunaat naalakkersuisuisa aamma suliniutiginiarpaat.
Qallunaat Beijingimi aallartitaqarfiat Shanghaimilu sinniisuutitaq paasititsiniaanermut ilanngunneqarsimasut, nunanut allanut tunngasunut ministeri aamma oqarpoq.
Puisinniartarnerup kalaallit oqartussaasuinit illersorneqarsinnaasumik nakkutigineqarnera qallunaat naalakkersuisuinit tatigineqarluinnartoq, Villy Søvndal oqarportaaq.
Qallunaat naalakkersuisui Ruslandimi, Hvideruslandimi Kasakhstanimilu, puisit amiinik eqqusseqqusiunnaaqqammisuni, ilanngaaserisut qullersaat massakkorpiaq oqaloqatigineqalersut nunanut allanut tunngasunut ministerip ilanngullugu oqaatigaa.
EU-p puisit amiinik eqqusseqqusiunnaarnera ukiup massuma naajartornerani qanoq kinguneqarsimanersoq, EU-kommissionip EU-mi inatsisartunut aamma nalunaarusiariniaraa, Villy Søvndalip Sara Olsvigimut akissummini aamma ilisimatitsissutigaa.