Danish Crown akiliinngippat nioqqutissiai toqunartulerniarlugit sioorasaarneqartoq

Allakkat qajuusaasanik peqqinnissamut aarlerinaatilinnik imallit Danmarkimi inuussutissanik nioqqutissiorfinnut arlalinnut nassiunneqarsimapput. Naalagaaffiup Politiivisa tamanna uppernarsarpaat.

- Pisoq ilungersunarpoq. Taamaammat nalunaarutiginninnerit politiinit oqartussanillu pimoorulluinnarneqarput, naalagaaffiup politiivini politiinspektøri Uffe Stormly TV2-mut taama oqarpoq.

Allakkat Belgiamit nassiunneqartut qajuusaasanik imaqaannaratik aamma sioorasaarutinik imaqarput. Suliffeqarfiit Bitcoininik 300.000 euronik nalilinnik akiliuteqanngippata niuertarfissuarni nioqqutissaataasa toqunartulernissaat sioorasaarutigineqarpoq.

Suliffeqarfiit allagarsisimasut ilaat tassaavoq Danmarkimi neqaarniarfissuaq Danish Crown.

Oqartussat qanimut suleqatigineqartut

Danish Crown apriilip aallartinnerani allagarsivoq. Allakkallu oqaasertaasa pimoorunneqartariaqarnerat Danish Crownip tusagassiinermut pisortaata Jens Hansenip qularutiginngilaa.

- Allakkat sioorasaarutaanerat ingerlaannaq paasinarsivoq, taamaammat politiit attaveqarfigipallappagut suliassanngortitsillutalu, taamaaliornikkut sioorasaarineq nalilersuiffigineqarlunilu paasiniaaffigineqarniassammat.

- Qanoq iliuuseqarnissarput pillugu oqartussat attuumassuteqartut qanittumik attaveqarfigivagut. Naliliinerugallartorlu naapertorlugu atuisartunut, pisisartunut sulisorisatsinnullu aalerinaateqanngikkallarpoq.

Allagarsiat kingunerisaannik Danish Crownip suliffissui tamaasa ilitsersuunneqarput qimaaffissiat isumannaaqqullugit. Aammattaaq suliffissuarnut isissutissat ingerlaavartumik nakkutigineqarnerat annertusineqarpoq.

Iffiukkanik nioqqutissiorfik aamma sioorasaarneqartoq

Aammattaaq Danmarkimi suliffeqarfissuaq Lantmännen Unibake, Schulstadimik Hattingimillu tunisassiortuusoq qaammatip matuma aallartinnera sioorasaarneqarpoq. Suliffeqarfik tusagassiorfinnut nalunaaruteqarluni taama ilisimatitsivoq.

Taama pisoqarnera aamma politiinut pilertortumik nalunaarutigineqarpoq, isumannaalisaanikkullu iliuuseqarfigineqartoq suliffeqarfiup ilisimatitsissutigaa.

Taamatullu allagarsisoqarsimanera pissutigalugu Europami nunani arlalinni politiit paasiniaanernik aallartitsisimapput.

Allakkat assigiimmik oqaasertaqartut siulliit apriilip arfineq-aappaani tiguneqarput, ilaatigut Sverigemi suliffeqarfik Findus allakkanik qajuusaasanik qaqortunik imalinnik allagarsisimalluni. Findus nerisassianik ineriikkanik ilaatigut tunisassiorfiuvoq.

Danmarkimi kattuffimmi Landbrug & Fødevarerimi pisortap Flemming Nør Pedersenip oqaatigaa suliaq pineqartoq Danmarkimi inuussutissanik nioqqutissiorfinnut ajortisaariniarnerit nalaatami ingasannersarigaat.

- Inuussutissanik nioqqutissiorfinnut sioorasaaraluni akiliisitsiniartoqarnera akuerineqarsinnaanngilluinnarpoq. Aatsaat taama ingasatsigisumik nalaataqarpugut, pisortaq oqarpoq.

Suliffeqarfiit sorliit qassillu pineqarnersut Naalagaaffiup Politiivisa oqaatigiumanngilaat.

Inuussutissalerinermut aqutsisoqarfik naapertorlugu allakkanik sioorasaarutinik nassinneqartut tamarmik nunani tamalaani suliffeqarfissuupput ilisimaneqarluartut.