Dan Jørgensen EU-p puisit amiinik mattussinera pillugu Dorisip apeqquteqarfigaa

Doris Jakobsenimmi Dan Jørgensenimut apeqqutigaa Kalaallit Nunaata puisit amiinik EU-mut nioqquteqarnera taperserniarlugu ministeri politikkikkut sutigut suliniuteqarniarnersoq.

EU-p puisinik tunisassianik mattussiniarneranik tapersersuisuusimasumik Danmarkip Naalagaaffeqatigiillu inuussutissanut ministerertaarsimanerat tunngavigalugu Dan Jørgensenimut taamatut apeqquteqarpoq. Dan Jørgensen Europaparlamentimut ilaasortaanermini taamaaliorpoq, aammalu "naggueqatigiit Inuit mattussinermut ilaatinneqannginnissaat" taamani tapersersimallugu.

Naggueqatigiilli Inuit immikkut pineqarnerat nunarsuarmi niueqatigiit kattuffissuata WTO-p unioqqutitsisutut nalunaarutigineqarpoq, taamaammat Dan Jørgensenip naalagaaffeqatigiit sinnerlugit EU-mut sinniisitaanermini aamma kalaallit piniartuinut ministerinissaa Doris Jakobsenip uppernarsartikkusuppaa.

Naggueqatigiit inuit mattussinermut ilaatinneqannginnissaannik WTO-p qanittukkut aalajangiinerata kingunerisaanik Danmark kalaallit puisinik tunisassiaannut tunngatillugu ilungersunartumik inisseratarsinnaavoq, EU-p Savalimmiut aalisakkanik nioqqutaannik mattussineranut assingusumik marloqisamillu inissittoorsinnaassalluni.

Taamaammat kalaallit piniartut Kalaallit Nunaatalu inuussutissanut ministerimit erseqqissumik paasitinneqarnissartik pisariaqartippaat.

Nalagaaffeqatigiit tamakkerlugit apeqqummi tassani EU-mut tunngatillugu sinniisuunissaminik paasinnissimanerminik, aammalu kalaallit puisit amiinik EU-mut nioqquteqarnerannik siuarsaarnissamut politikikkut suliniuteqarnissaminut piareersimanini takutittariaqarpaa, Doris Jakobsen Siumumeersoq inuussutissanut ministerimut saaffiginnissutimini taama allappoq.