Cykilerumatoorsuaq Sisimiunut ingerlaqqilerpoq

Tassalu sapaatip-akunneri pingasut Nuummeereerluni Ilulissanut Sisimiunullu maanna ingerlaqqittussanngorpoq.

Somen Debnathilli Kalaallit Nunaanniinnermini sunamita ilikkarpaa:

- Ilikkagaqaqaanga. Puisip neqaanik uutsisinnaavunga, aamma tuttut qanoq iganissaat ilikkarlugu. Angalanera tassaasimavoq nuannersumik paarlaateqatigiinneq, kalaallinillu ilikkagaqaqaanga, Somen Debnath oqarpoq, oqaluttuarlunilu Nuummiinnermini atuarfiit ilinniarfiillu arlallit pulaarsimagini, taakkunani pikkorissartitsillunilu pikkorissaasarsimalluni. Titartaanermut pikkorissaasarsimavoq, yougartitsisarluni, indiamiut kulturiat oqaluttuarisarsimavaa, atuartullu HIV AIDS-ilu pillugit oqalugiarfigisarsimallugit.

- Ilinniartitsisut ajunngisaaqaat meeqqallu silassoreqalutik. Oqaloqatiginnittarnikka seminarertitsinikkalu nuannarisimaqaakka.
Kalaallinik naapitsinini Kalaallit Nunaanni kulturimik ilinniiarfigisimaqaa, aamma Indiap Kalaallit Nunaatalu kulturiisa assigiissutaat assigiinngissutaallu takusinnaasimavai.

- Inuit 1 milliardit sinneqarpugut, 50.000-illu sinnilaaginnarlugit Kalaallit Nunaanni najugaqarput, kisianni tamatta assigiissuseqarpugut. Maani inuit tupinnaannarput. Ammasuupput, inussiarnersuullutik pisariippasissumillu inuuneqarlutik. Pissutsit pingaaruteqarluinnartut, maanili najugallit taakku ataatsimoorullugit pigisaraat, Somen Debnath oqarpoq, tikeraarnermini politikerinik nuimasunik aamma naapitaqartoq. Peqqissutsimut Naalakkersuisoq, Agathe Fontain, aamma Naalakkersuisut siulittaasuat, Kuupik Kleist naapitaanut ilaallutik.

- Angalanerma siunertaa oqaluttuarigakku Kuupik Kleistip nuannaarutigisorujussuuvaa. Oqarfigaanga ikiorusullunga, isumaqarami Kalaallit Nunaanni kinguaariit inuusuillu pissanganartunik paasisaqartissinnaagikka.

Somen Debnath pingasunngorpat Sisimiunukarnissaminut billitsimik taamaalilluni ullumi pissarsivoq, Sisimiuniillu Ilulissiassaaq septem barip ulluisa 28-anni, nunani India illoqarfinni taakkunani oqaluttuarissavaa, meeqqallu titartaanermik ilinniartissallugit. Illoqarfinnili taakkunani marlunni qanoq ingerlassanerluni soorunami suli nalugallarpaa.

- Sumi najugaqassanerlunga nalugallarpara. Nalunngiinnarpara sapaatip-akunneri marluk sinnilaarlugit taakkunani illoqarfinnissallunga, allamik naamik.

Taamaammat kaammattuutaa ersarippoq. Ikiorneqarsinnaaguni qujarutissaqaa.

- Atorfissaqartippassi, qanilliniarisinga, immitsinnut ilinniaqarfigeqatigiissagaluarpugut.

Somen Debnath ikiorserusukkaanni attavigineqarsinnaavoq oqarasuaat 29 68 83 atorlugu, imaluunniit somendebnath2020@gmail.com