CSR siunissami avaqqunneqarsinnaanngilaq
Isumasioqatigiinnermi saqqummiussinerit workshopillu atorneqassapput. Saqqummiussisussat ilagaat ilisimatooq Andreas Rasche Copenhagen Business School-imeersoq aamma Birgithe Mogensen, Price Waterhouse Coopersimiit aamma Anders Meilvang Transparency Internationalimeersoq.
- Nunani allani suliffeqarfinnut unammillersinnaanerup pitsanngorsarneqarnissaa periarfissallu nutaat sammineqarput aammalu piujuaannartitsinermik tunngaveqartumik ingerlatsineq. Sammineqartussat ilagaat periarfissat nutaat takkuttut qanoq iluaqutigineqarsinnaanersut CSR iluaqutigalugu pilersaarusiorluarnikkut, Anita Hoffer oqarpoq.
Nunatsinni suliffeqarfiit namminersortut pisortallu ingerlataat CSR-mik atuilereerput. Kingullertut Kommune Kujalle CSR pillugu qanittukkut isumasioqatigiissitsivoq sulisinnaanngorsaanissaq sungiusaatigalugulu suliffissanik pilersitsinissaq sammineqartunut ilaalluni. Sulisussaqarniarneq eqqarsaatigalugu ilorraap tungaanut ingerlasoqarnera sulisut akornanni malugineqarpoq.
- Kalaallit Nunaanni ukiut ingerlaneranni suliarisimasavut CSR-imut eqqaanartorujussuupput. Tassani isumaginninikkut akisussaaqataaneq takussaajuarsimavoq maannalu tamanna taaguuteqalerpoq. CSRip iluani aamma peqquserlunnerit sammineqarput qanorlu pinngitsoorneqarsinnaanersut. USA-mi aktiatileqatigiit tamarmik whistle blowerimik taaneqartartumik periuseqarput. Maani suliffeqarfiit taamatut periuseqalertuuppata assersuutigalugu aatsitassarsiornermi pilersuisut akornanni suliffeqarfiit peqquserlutsaaliilluni politikkeqalernissaat avaqqunneqarsinnaanngilaq, saqqummiusseqataasussaq Anders Meilvang oqarpoq.
