Cryosat aallartinneqaannaqaaq
Cryosat Issittumi kaaviiaartussanngorlugu 2005-imili aallartinneqartussaagaluarpoq, raketsili aallartinneqarneranut atortoq taamani nakkarpoq, ukiunilu arfinilinni sanasimaneq asuliinnarpoq.
Qaammataasiaq ukioq manna februaarimi aamma avataarsualiartinneqartussaagaluarpoq, orsussarli tamatumuuna ajornartorsiutigineqarmat, aallartinnissaa kingumut kinguartinneqarpoq.
Ullumikkulli tassa iluatsippoq, tammalu Kalaallit Nunaanni Silap pissusaata allanngoriartornera pillugu Nuummi Sullissivimmeersup, Søren Rysgaardip, nuannaarutigaa:
- Sikup aakkiartornera pillugu paasissutissat pitsaanerungaartut qaammataasiap nassiuttalissavai, Issittumilu tamarmi silap pissusaata allanngoriartornera pillugu siumut naatsorsorluarnerulissavarput, Søren Rysgaard KNR-imi nutaarsiassaqartitsivimmut oqarpoq.
Cryosat 700 kilometerinik qutsitsigisumiissaaq, radarillu atortua iluaqutsiullugu paasissutissanik nunarsuatsinnut nassitsisassaaq. Sikup portussusaa radarip uuttuutaa atorlugu centimeterialunnguaannarnik nikingasumik eqqorluarneqarsinnaassaaq. Ukioq naallugu aamma nassitsisasasaq.
