Coronavirusip ernummatiginera: Namminersorlutik Oqartussani sulisut imminnut eqitaaqqusaajunnaartut
Assatit errortorluartakkit suleqatitillu eqitaarunnaarlugit.
Danmarkimi Peqqinnissamut aqutsisoqarfiup danskinut ullumi innersuussuteqarneratulli Inatsisartuni ilaasortat ullumi taama allagarsipput. Tamanna coronavirusip tuniluunnerata killilersimaarniarneranik pissuteqarpoq.
- Peqqinnissamut aqutsisoqarfik innuttaasut piffisilersuutaanik nakkutilliinianngilaq. Kisianni assamminnata, eqitaarnata kuniarnatalu pissagusut kaammattuutigaa, Peqqinnissamut aqutsisoqarfiup pisortaa, Søren Brostrøm ullumi oqarpoq.
AAMMA ATUARUK Ilaqutariit Nuummeersut angerlarsimaannaqquneqartut: Coronaviruseqarnerluta misissorneqarusukkaluarpugut
- Inuiaqatigiinni maani tuniluuttoqaratarsinnaaneranik pinaveersaartitsiniarnermut iluaqutaassaaq, pisortaq nangippoq.
- innuttaasut nunami aarlerinaatilimmeereerlutik nunatsinnut uternerminniit ulluni 14-ini tulliuttuni angerlarsimaannaqqusaapput.
- innuttaasut nunami aarlerinaatilimmeereerlutik nunatsinnut utersimasut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutinnginnissaat innersuussutaavoq.
Nunat aarlerinaatilittut pineqartut makkuupput:
- Italiami nunap ilai Emilia-Romagna, Lombardiet, Piemonte Venetolu
- Irani tamarmi
- Kina (Hong Kong, Macau Taiwanilu minillugit)
- Korea Kujallermi nunap immikkoortua Gyeongbuk tassanilu illoqarfissuaq Daegu
Tusarfik: Nunatta tunillaassortunik nappaalasoqarneranut ataatsimiititaliarsua, Danmarkimi peqqissutsimut aqutsisoqarfik
Namminersorlutik Oqartussanilu sulisut maanna aamma taama kaammattuuteqarfigineqartut, Naalakkersuisut siulittaasuata naalakkersuisoqarfiata pisortaa, Hans Peder Barlach Christensen oqarpoq:
Naalakkersuisut siulittaasuata naalakkersuisoqarfiata pisortaa Hans Peder Barlach Christensen taama oqarpoq.
- Kalaallit Nunaanni Upalungaarsimanermut Ataatsimiititaliarsuup qanoq pissusilersornissamut malittarisassai emailikkut allakkanni kakkiuppakka. Eqitaartoqannginnissaanut tassani ilaatigut kaammattuuteqarpoq, assaallu asalluartarnissaannut tunngasut ilaalu ilanngullugit.
Nunatsinni tunillatsissimasoqanngitsoq
Nunatsinni coronavirusimik suli tunillatsissimasoqanngilaq. Nappaatilli anngunnissaa ilimanaateqartoq, Nakorsaaneqarfiup nalilerpaa.
Danmarkimi tunillatsissimasut 22-upput, taakkunannga ataaseq peqqisseqqippoq.
Savalimmiuni tunillatsissimasoq ataasiinnaavoq, Islandimilu 43-t tunillatsissimasutut nalunaarsorsimapput.
- Tunillanneqarsimasinnaavutit naluinnarluguli. Nunamullu aarlerinaatilimmut angalasoqannginnissaanut kaammattuutip nunanut allanut tunngasunut ministereqarfimmit suli saqqummiunneqannginnerani nunami aarlerinaatilimmiissimaguit tunillatsissimasinnaavutit. Iliuutsitit tamanna pillugu mianersuutigikkit eqqiluisaarlutillu, Hans-Peder Barlach Christensen oqarpoq.
AAMMA ATUARUK Nuummi ilaqutariit nunami coronaviruseqarfiusumeereerlutik angerlarsimaannaqquneqarallartut
Taamaammat Namminersorlutik Oqartussani sulisut mianersortumik sissuertumillu iliuuseqassasut taanna isumaqarpoq.
- Inuppassuit sumiiffimmiit sumiiffimmut allamut angalasarput. Namminersorlutik Oqartussaniittut, tassungalu attuumassutillit, soorlu ulloq unnuarlu paaqqinnittarfiit Peqqinnissaqarfillu mianersortariaqarput, Naalakkersuisut siulittaasuata naalakkersuisoqarfiani pisortaq Hans Peder Barlach Christensen oqarpoq.
Danskit oqartussaasuisa aaqqissuussinissat 1000-it sinnerlugit peqataaffigineqartussat tamarmik kinguartinneqanngikkunik taamaatiinnarneqarnissaat aamma kaammatuutigaat.
