Coronavirusimik tunillatsissimasut nunarsuaq tamakkerlugu 19 millionit sinneqartut

Coronavirusimik tunillatsissimasut nunarsuaq tamakkerlugu 19 millionit sinneqartut uppernarsarneqarsimapput.

Johns Hopkins Universitymit kisitsisit danskit nalunaaqutaat naapertorlugu tallimanngornermi ullaakkut taama takussutissiipput.

Taamaalilluni ullut sisamat ingerlaneranni nunarsuaq tamakkerlugu tunillatsissimasut 1 millioninik amerlanerusunik ilaqqipput. Kisitsisit taakku ataasinngormat 18 millioninngorput.

Juunip ulluisa 28-anni tunillatsissimasutut uppernarsarneqarsimasut 10 millionit qaqimmatigilli ullut sisamat arfinillillu ingerlaneranni millioninik amerleqqittalerput.

Virusip Kinami siorna ukiup naajartulerneraniilli tuniluutilernerani amerleriarnerujussuuvoq.

AAMMA ATUARUK Virusi allanartoq Kinami illoqarfinnut allanut perngaammik siaruaattoq

Tunillatsissimasoq siulleq januaarimi uppernarsarneqarmalli nunarsuaq tamakkerlugu tunillatsissimasut 1 millioninngornissaanut qaammatit pingasut ingerlapput.

Johns Hopkins Universitetimit naatsorsuinerit nunani ataasiakkaani peqqinnissamut oqartussaqarfiit tunillatsissimasunik uppernarsaanerat kisimi ilaavoq. Taamaammat tunillatsissimasut amerlanerungaatsiarsinnaapput.

USA-mi Brasiliamilu tunillatsissimasut nunarsuaq tamakkerlugu tunillatsissimasut 19 millioniusut 40 procentiisa missaarigaat, nutaarsiassaqartitsivik AFP allappoq.

USA-mi tunillatsissimasutut uppernarsarneqarsimasut 4,8 millioniupput, Brasiliamilu 3 millioningajaat uppernarsarneqarsimallutik.

India nunat tunillatsittoqarnerpaasut pingajoraat, tassani tunillatsissimasut 2 millionit angujartulerpaat, Indiamilu coronamik toqquteqartut 40.000-iullutik.

Mexico nunani coronamik toqquteqartunik 50.000-inik nalunaarsuisimasuni tallimanngornermi unnukkut pingajunngorpoq.

AAMMA ATUARUK Tamaat isigalugu: Coronavirus pillugu killiffik

Nunarsuaq tamakkerlugu coronavirusimik tunillatsissimasutut uppernarsarneqarnikuusimasunit peqqisseqqissimasutut nalunaarutigineqartut katillugit 11,5 millioniupput. Nunarsuarlu tamakkerlugu coronamik toqquteqartut 713.406-iupput.

Coronap tuniluutilerneranik Danmarkimi tunillatsissimasutut uppernarsarneqartut 14.306-iupput, coronamillu toqquteqartut 617-iullutik.

/ritzau/