Coronavirusimik Danmarkimi tunillanneqarsimasut 340-sut
Inuit 340-t Danmarkimi coronavirusimik tunillanneqarsimapput. Napparsimasut isumannaatsuunissaat pillugu aqutsisoqarfik, Styrelsen for Patientsikkerhed, pingasunngornermi taama ilisimatitsivoq.
Marlunngornermut naleqqiullugu amerleriaataavoq, 262-immi tunillanneqarsimasut marlunngornermi nalunaarutigineqarpoq.
1. Assatit asakulakkit assannullu spritti atoruk
2. Talinnut/ikusivit peqittarfianut kakkissarfimmut quersorit tangajorilluunniit - assannut pinnak
3. Assamminnaveersaarit, ersakkut kunissinaveersaarit eqitaarinaveersaarillu – timimiit timimut attaveqarnaveersaarit
4. Eqqiaanissaq eqqumaffigiuk - angerlarsimaffimmi suliffimmilu
5. Utoqqaaguit anigorsinnaanngisannilluunniit nappaateqaruit - inunnut qanillattornaveersaarit inuillu qajassuussinissaannut qinnuigikkit
Nualluutip aallaqqaammut tuniluutilertornerani inuit 580.000-it pallillugit Danmarkimi tunillanneqarsinnaanerat ernummatigineqarsinnaasoq, Peqqissutsimut Aqutsisoqarfiup oqaatigaa.
AAMMA ATUARUK Nakorsaq coronavirusip ernumassutigineqarnera pillugu: Eqqissillusi inuunersi ingerlatiinnassavarsi
Taakkunannga 11.200-t missaat napparsimmavimmut unitsinneqartariaqarnissaat nalilerneqarpoq, taakkunanngalu 2800-t peruluttut unitsinneqartarfianni passunneqarnissaat nalilerneqarluni.
Danmarkimi inuit 1680-it 5600-llu akornanni nappaatip tuniluunnerata nalaani nappaammit toqquteqarnissaat ilimagisariaqartoq oqaatigineqarpoq.
Kalaallit Nunaanni suli tunillatsissimasoqanngilaq. Danmarkimiit Kangerlussuarmut timmisartorsuarmi ilaasuni pingasut ataasinngormat tunillanneqarsimassangatinneqaleraluarput. Tunillanneqarsimanngitsulli, misissorneranni inernerit takutippaat.
