Coronavirusi akitigullu unammilleqatigiinnerit pissutaallutik uuliap akia appariartortoq
Coronavirusip nunani tamalaani tuniluunnerata ilutigisaanik nunarsuarmi uuliaatilissuit akerleriilermata uuliap akia apparujussuarpoq.
Uuliap akiata apparujussuarneranut pissutaasut arlaliusut, USA-mi nutaarsiassaqartitsivik Bloomberg News allappoq.
Uuliap piumaneqarnera coronavirusi pissutaalluni annikillivoq - ilaatigut timmisartuussisoqarpiarunnaarnera pissutaalluni.
Aamma Ruslandip uuliamillu nioqqutissiortut kattuaffiata OPEC-ip isumaqatigiinniarnerat tallimanngormat ajalusoorpoq.
Uuliap akiata qaffannissaa anguniarlugu uuliamik nioqqutissiornerup annikillinissaa pillugu isumaqatigiissusiornissartik oqaluuseraat, Ruslandili taamaaliorumanani.
Nunatsinnut maannangaaq sunniuteqarnavianngitsoq
Nunarsuarmi uuliaatilissuit annerpaartaasa ilaata, Saudi-Arabiap uuliaatimi akia sapaatip akunnerata naanerani appangaatsiarpaa.
Asiami niuerneq ataasinngornermi ammarneqarmat uuliap akia issariarnialuit ingerlaneranni 31 procentit sinnerlugit apparpoq.
Uuliap akia Irakip Kuwaitillu 1991-imi sorsunnerisa kingornali ullup ataatsip ingerlanerinnaani aatsaat taama appartigisoq, USA-mi nutaarsiassaqartitsivik Bloomberg News allappoq.
Uulialli akiata appariartornera nunatsinni maannangaaq malugineqarnavianngilaq, uuliami nunatsinnut eqqussorneqartup annertussusaa piffissamut sivisuumut naammattuuvoq, akuttusuumik pisisoqartarluni. Polaroilip pisortaa Githa Brask KNR-imut tallimanngornermi taama ilisimatitsivoq.