Coronap nunatsinnut anngunneranit ukioq ataaseq qaangiuttoq: Tupaqqangaarama ingillunga nerrivik tigulluartiterpara
Nuumminngaanneersoq tunillatsissimasuuvoq.
Kim Kielsenip (S) Naalakkersuisut siulittaasuata tamanna tusagassiortunik ullaap tungaani katersortitsinermi nalunaarutigaa:
- Naatsorsuutigineqarluinnarpoq. Tunillatsissimasoq sumiiffinni aarlerinaateqartumiissimavoq, taannalu angerlamut tikikkamili angerlarsimaffimmini mattuteqqasimavoq, Kim Kielsen oqarpoq.
AAMMA ATUARUK Nunatsinni inuk ataaseq coronavirusimik tunillatsissimasoq
Ullut marluk qaangiunneranni ajornerulerpoq. Coronamik tunillatsissimasoq alla illoqarfiit pingaarnersaanni marsip ulluisa 18-ianni aamma uppernarsarneqarpoq. Taannali sumi tunillatsissimanersoq ilisimaneqanngilaq – taamannalu pissutigalugu illoqarfiit pingaarnersaat sisamanngornermi ualikkut sisamanut matuneqarpoq.
AAMMA ATUARUK Nuuk matuvoq: Nalunaaqutaq 16:00-imiit ima ilioqqusaanngilatit
Illit ukioq ataaseq matuma siorna marlunngorneq eqqaamaviuk? Sulerivit? Ukioq kingulleq ilinnut qanoq ippa?
Tamanna knr.gl-ip Nuummi inunnut apersuutigaa.
Dorthe Jordeningip Nuummi Atuagkani atuagaarniap ulloq eqqaamalluarsinnaavaa:
- Maani atuagaarniarfimmit tusagassiortunik katersortitsinermut qarasaasiakkut malinnaavunga. Isumaqaleraluarpunga uppissallunga – tassami tupaqqangaarama, atuagaarniaq oqarpoq.
- Sooruna?
- Uissuummissutigingaatsiarpara – eqqarsaatigiinnalerlugu ingillunga nerrivik tigulluarterpara. Tamatuma kingorna atuagaarniarfik matuarput angerlarlutalu. Pisiniartoqanngilaq. Sanilerisatsinnut Pikkori Sportimut iserlunga matuniarnersut paasiniaavunga. Taamaaliorunarput – kisianni uanga erngertumik angerlarniapallappunga – tunillatsikkusunnginnama!
Pisiniarfik killilersuinerit sukannersut malillugit ullualuit qaangiummata ammaqqippoq.
- Pisiat qassit pisiniarfimmut isernerat nakkutilluartorujussuuarput assanullu tunillannartuiaammik piareersimatitsilluta, Dorthe Jordening oqarpoq.
- Maani Nuummi meeraqarluta ernutaqarpugut, aallaqqaammut takuallaarneq ajorpagut. Atuagaarniarfimmili ingerlalluarluta taamaammat naammagittaalliutissaqarpallaanngilagut.
Siunissaq coronamik tuniluuffiusoq qanoq eqqarsaatigaajuk?
- Eqqarsaatigiuk nipilersortunik tusarnaariarnermi inuit hunnorujulikkaat siusinnerusukkut ataatsimoortarnikuupput. Ullumikkullu... Arlaannik allanngortoqarpoq. Mianersortoqarlunilu inunnut allanut qanillattortoqarpallaanngilaq. Nalinginnaasunngoqqinnissaanut piffissap sivisusinnaanissaa ernumassutigaara. Immaqa nalinginnaasunngoqqissanngilaq. Uanni initoorujussuuvoq, Dorthe Jordening oqarpoq.
Nunani allanitulli ajortigissanngitsoq
24-nik ukiulimmut, Henry Petersenimut coronamik tunillatsissimasumik nunatsinni uppernarsaasoqaqqaarneranut nutaarsiassaq ernumaammernalaarpoq. Taannami meerartaaqqammersimavoq.
- Taamani pissanganaqaaq.
Sooruna?
- Iliuusissat aallaqqaammut qanoq iliussanerluni nalornissutiginarlutik. Tuniluunneralu sukkasuupilussuulluni, taanna oqarpoq.
- Eqqarsaatiginerpaarava paniga. Inoorlaajulluni ernumassutaaqaaq taamani. Arlaannik sapigaqarnersoq imaluunniit sanngiissuteqarnersoq nalugatsigu, ernumanarluni suliinnarnissannut.
Ullumikkut qanoq eqqarsarpit?
- Allamiunut sanilliullugu ingasappallaanngilaq Nuup matuneqarnera, kisianni susassaarutipiloorpugut. Killinitsiternera peqqutaalluni.
- Ullumi immaqa ernumanarpallaanngilaq akiuussutissaqalernikuuriarami, Henry Petersen oqarpoq.
Imminut mianersuunnerunissaq ilikkarsimagaa
55-inik ukiullip, Thue Noahsenip ukioq ataaseq matuma siorna ulloq aamma eqqaamasinnaavaa. Taanna takornarialerinermik suliaqarpoq nuannaralugulu.
- Angallassisuugaluarpunga takornarianut. Eqqumiiginarsinnaavoq taamani, suna tamarmi uneriataartutut pissuseqarpoq, angallassaarulluta taamatut misigivara.
Maannamut qanoq ingerlanera igiviuk?
- Uagutsinnut inuttut tunillaassortutut eqquerujussuanngikkaluarluni, kisianni suliatsinnut misinnartupilussuuvoq. Suliffissaaleqinikkut allamillu ujartortuisariaqarluni.
- Aappaatsigut immitsinnut paarinissaq immaqa tassani annerusumik ilikkaraqarpugut.
"Sungiuppara"
Inge-Lene Falksen 28-nik ukioqarpoq.
Taanna Nuummi utoqqaat illuanni sulisarpoq. Taanna ukioq ataaseq matuma siorna suli ilinniartuuvoq, coronamillu tunillatsissimasumik Nuummi uppernarsaasoqaqqaarnera tassunga uissuumminalaarsimavoq.
- Nalornivunga, nutaajummat taamatut misigisaqarluni.
- Atuaqatikkalu eqqartuingaatsiarpugut taavalu tusagassiortunik katersortitsinerit malinnaaffigisarlugit.
Ullumikkut qanoq igiviuk?
- Ullumikkut sungiutiinnarpakka. Peqqissaanermik ilinniarfimmi mianersorneq sullisseriaatitsinni sungiusimaannarlugu.
Coronamik tunillatsissimasutut nunatsinni uppernarsarneqarsimasut katillugit 31-upput.
Taakku tamarmik peqqisseqqinnikuupput.