Royal Greenland Kinamut niuernermini corona pissutigalugu allannguisariaqartoq
Royal Greenland naatsorsuutit 2020-moortut naatsorsorneqarmata 2009-2010-p kingornatigut aatsaat siullermeertumik amigartooruteqarpoq.
Amigartooruteqarneq ataatsimik pissuteqarpoq. Kinami tunisat coronap kingunerisaanik ikileriataaqaat, Kinamilu eqqussuinermi malititarisassat atuutilersut qaammatini kingullerni Royal Greenlandimut sunniuteqarput.
Royal Greenlandip tunisaami 20 procentii Kinami tunisarpai, annerpaamik qaleraliusut raajaasullu qalipallit, Kinamiut februaarip aqqaneq-aappaani ukiortaarsiornissaanut tunineqartartut.
- Tunisatta 20 procentii Kinami tunisaratsigit, ajornartoqartinngilara. Kisianni nioqqutissiaatitta assigiinngitsut amerlannginnerisa sivikitsuinnarmilu tunisassaasarnerisa allanngortinnissaanut iliuuseqartariaqarpugut, suliffeqarfiup ukiut qulit sinnerlugit pisortaa, Mikael Thinghuus oqarpoq.
AAMMA ATUARUK Royal Greenland millionilikkaanik amigartooruteqarlunilu kaaviiaartitai appartut
Tassa Kinamut amerlanerusunik nioqqutissiorusukkaluarpoq. Piffissap annikitsup iluani marluinnarnik nioqqutissaateqarnissaq atorsinnaanngilaq.
- Piffissap sivikitsup ingerlanerani marluinnarnik nioqqutissiornata, assigiinngitsunik nioqqutissanik arfinilinnik Kinamut ukiumut 100 millionit koruuninik nalilinnik nioqqutissiortariaqarpugut. Kinamilu nunap ilaanut massakkumiit sukkanerusumik nioqutissiornerunissaq siunertaavoq, taanna oqrpoq.
USA-mi suliniuteqarneruneq nioqqutissallu amerlanerusut
Nunarsuup ilaanni niuernerunissaq Royal Greenlandip ukiuni arlalinni anguniagaraa. Taamaammallu aamma tamanna pillugu Amerikap avannaani 2020-mi aningaasaliisoqaqqippoq, tassanimi suliffeqarfimmik Canadami pisisoqarpoq, nioqqutissanillu tuniniaanissamut allaffeqarfimmik USA-mi ammaasoqarluni.
AAMMA ATUARUK Royal Greenlandip ilaata namminersortunngorsarnissaa illuatungiliuttut akerlerigaat
- Amerikap avannaani ineriartortitsinissarput qularutiginngilarput, takorluukkatsinniit annertunerusumik ineriartortoqarluni. Tamaattumillu taakkani pisortassamik atorfinititsivugut, suliffeqarfimmillu peqqissaartumik pilersititsilluta, Mikael Thinghuus oqarpoq itisiliillunilu, nioqqutissiat assigiinngitsunik amerlineqassasut.
- Uumasut assigiinngitsut eqqarsaatigalugit 2020-mi iluanaaruteqareersimaqaagut, raajat qaleruallit, raajat qaleruaqanngitsut uunikullu, qalerallit saattuallu tunisaalluarmata. Siunissaq eqqarsaatigalugu assigiinnginnerusunik nioqqutissiortariaqassaagut.
AAMMA ATUARUK Royal Greenland millioninik annaasaqaraluartoq sinneqartooruteqarnissaq pisortap naatsorsuutigigaa
Soorlu inalugallit, uillullu nalituut assigiinngitsut, peqqussuit, saattuallu assigiinngitsut allat.
- Coronamit ilikkagara tassaavoq, ajutooratarsinnaanermut ilimanaatinik ilikkagaqarsinnaanissaq, taanna naalisaavoq.
Royal Greenland 2019-mi ukiumut 368 millionit koruuninik amigartooruteqarpoq. Suliffeqarfik 2020-mi 57 millionit koruuninik amigartooruteqarluni.
Tunisat 478 millionit koruuniniit katillutik 4,8 milliardit koruuninut apparput.
