Royal Greenland millionilikkaanik amigartooruteqarlunilu kaaviiaartitai appartut

Aalisakkerivissuaq 2020-mi ukiuni qulikkaani aatsaat taama angusaqarnerlutsigalunilu amigartooruteqarpoq, tamanna pisortaanerup naatsorsuutigisimanngikkaluarpaa.
2020-mi ukiumut angusat piffissami nutaanerusumi tassa 2008/9-mi aamma 2007/8-mi amigartooruteqangaatsiarnernit taamaallaat qaangerneqarput. Assi © : Royal Greenland
Allattoq Malik Brøns
maajip 06-at 2021 12:33

57 millionit koruuninik amigartooruteqarneq. Royal Greenlandip siorna angusai taama inerneqarput. Royal Greenlandip angusat ilorrisimaarnannginnerarpai, aamma naak tamanna nunarsuarmi tamarmi tunillaassuuttoqarneranik pissuteqaraluartoq.

- Royal Greenland A/S-ip 2020-mi akileraannginnermi angusai nalinginnaasut 44 millionit koruuninik amigartooruteqarfiupput. Tamatumunnga kilisaammik ikerinnarsiummik taarsiinermi 15 millionit koruuninik naleqartumi annaasat ilanngunneqassapput.

- Amigartoorutillu katikkaanni akileraannginnermi 59 millionit koruuniummata tamanna nualluummik nunarsuarmi tamarmi tuniluuttumik pissuteqaraluarpalluunniit imminermini naammaginanngilaq, pisortaq, Mikael Tinghuus tusagassiuutinut nalunaarummi oqarpoq.

Royal Greenlandip 2009-2010-p kingornatigut aatsaat siullermeertumik amigartooruteqarpoq. Royal Greenland taamani 43 millionit koruuninik amigartooruteqarpoq.

2020-mi ukiumut angusat piffissami nutaanerusumi tassa 2008/9-mi aamma 2007/8-mi amigartooruteqangaatsiarnernit taamaallaat qaangerneqarput.

Kaaviiaartitat oqaluttuarisaanermi eqqaamaneqartussanik appartut

Aalisakkerivissuup kaaviiaartitat oqaluttuartisaanermi eqqaamaneqartussat aamma nalaappai. Royal Greenlandimmi kaaviiaartitai ukiup siuliani 5.327 milliardit koruuniusut 2020-mi 4.849 milliardit koruuniupput.

Royal Greenlandip pisortaata, Mikael Tinghuusip aalisakkerissuup sinneqartooruteqarneqarnissaa 2020-milu tunisaqarluarnissaa qularutigisimanngikkaluarpaa. Ajornartoortoqarporli pingaartumik Kinami

AAMMA ATUARUK Royal Greenland millioninik annaasaqaraluartoq sinneqartooruteqarnissaq pisortap naatsorsuutigigaa

Kina Royal Greenlandip tuniniaavigisartagaani ataasiakkaani annerpaavoq. Tuniniaanermi tamakkiisumit 20 procentit Kinamut tunineqartarput.

Kinamut nioqquteqarnerup ajutoornerani Kinap aalisakkanit nioqqutissiat coronamik ilaqarsinnaanerannik ernumassuteqarneranik pissuteqarpoq.

Taamaammat Kinap eqqussuinermi malititarisassat sukannersut atulersippai, taamaalilluni Kinap inuussutissat Kinamut eqqunneqartut tamarmik misissortalerpai. Tamatumalu saniatigut aalisakkat sorliit aalisartunit sorlernit pisarineqarsimanersut nalunaarsorneqartarnissaat piumasaqaatigaat.

Taamaalilluni Royal Greenlandip qaleralinnik raajanillu nioqqutissiai, millioninik nalillit Danmarkimi Europamilu amerliartuinnalerput.

Eqqussuinermut killilersuinerit ullumikkut sukangavallaarunnaarnikuupput. Taamaakkaluartorli eqqussuiniarnerup ilungersunarnera Royal Greenlandimut akisungaatsiarpoq.

Aningaasanik aallerfigisinnaasaqartoq

Aalisakkerivissuarmi piffissanut ajornartoorfiusunut qulakkeersimavoq. Royal Greenlandimmi aningaasaqarnikkut ajornartoornissamut ikiuutaasinnaasut 700 millionit koruunit aningaaserivini aqqutigalugit pilersippai. Tamanna Royal Greenlandip nalinginnaasumik aningaaserivimmisulli aningaasanik aallersinnaanissaanut periarfissaqartitsivoq.

Aalisakkerivissuulli aningaasat suli atunngilai.

- Aningaasaqarneq malinnaavigeqqissaarneqarpoq, Royal Greenlandilu ajornartoorneq qaangiuppat nukittunerulerniassammat nualluutip nunarsuami tamarmi tuniluuttup kinguneri minnerpaaffissaaniitinniarlugit suliniutit pisariaqartut tamaasa suliarisarpagut, Royal Greenland tusagassiuutinut nalunaarummi allappoq.