Issittoq pillugu ataatsimeersuartoqarnissaa corona pissutigalugu kinguartinneqartoq

Arctic Circlep ukiumoortumik ataatsimiittarnerat, coronap ajornartoortitsinera pissutaalluni kinguartinneqarpoq, aappaagulu aatsaat ataatsimiittoqassalluni.
Arctic Circle tassaavoq Issittoq pillugu nunat tamalaat peqataaffigisartagaasa annersaat. Inuit 2000-init amerlanerusut, nunanit 60-ineersut, Arctic Circlep Reykjavikimi ukiumoortumik ataatsimeersuartarput. Assi © : Michael Ransburg/Flickr Creative Commons
Allattoq Nutaarsiassaqartitsivik / Nyhedsredaktionen
aggustip 14-at 2020 10:32
Nutserisoq Mads Lynge

Canadami tusagassiorfik Eye On The Arctic nittartakkamini taama allaserisaqarpoq.

Arctic Circle tassaavoq Issittoq pillugu nunat tamalaat peqataaffigisartagaasa annersaat. Inuit 2000-init amerlanerusut, nunanit 60-ineersut, Arctic Circlep Reykjavikimi ukiumoortumik ataatsimeersuartarput.

Arctic Circlep ukioq manna taamaatiinnarneqarnera, islandip præsidenterisimasaata Ólafur Ragnar Grímssonip, Arctic Circlemilu maanna siulittaasuusup, nalunaarutigaa.

Oqallitsitsinerit sisamat, nunani assigiinngitsuni pisussatut taarsiullugu pilersaarutigineqarput, assigiinngitsunillu oqallisiginnittoqartassalluni. Ólafur Ragnar Grímsson taama ilisimatitsivoq.

Kalaallit Nunaanni aappaagu ilaatigut oqallitsitsisoqassaaq. Oqallitsitsinissaq suli ullulerneqanngilaq. Pissaanillit Issittumi iliuusaat, aningaasarnerullu ineriartornera, sammisassat pingaarnerit ilagissavaat.

Tysklandip illoqarfiisa pingaarnersaanni Berlinimi, Japanimi Tokyomi De Forenede Arabiske Emiraterini Abu Dhabimi aamma oqallitsitsisoqarumaarpoq.

Arctic Circle, aappaagu 2021-mi oktobarip ulluisa 14-iannit 17-iata tungaanut pisussatut pilersaarutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq