Corona: Qaannat unammersuarnissaat taamaatinneqarpoq
Nunatta nakorsaanera pingasunngornermi nalunaarpoq Ilulissani coronamik tunillatsissimasoqartoq. Pingasunngornermilu unnukkut Qaannat kattuffianni siulersuisut ataatsimiikkasuarput. Ataatsimiinneq naammassinmnat isumaqatigiissutigineqarpoq qaannat unammersuarnissaat aappaagumut kinguartinneqassasoq.
AAMMA ATUARUK Borgmesteri inuillu qulingiluat allat coronamik tunillanneqartoqarmat angerlaqqusaasut
Qajartortartut 180-t missaanniittut qaannat unammersuarneranni QU-mut naalisarneqartartumi peqataasussaagaluarput.
- Coronap tuniluussinnaanera ernumanartoqarpoq. Taannaavoq taamaatitsinermut tunngaviusoq. Unammeqataasut arlallit atortut paarlakaallutik unammersuarnerni atortarpaat tamannalu pissutigalugu tuniluuttoqarsinnaanera ernumanartoqarpoq, Qaannat kattuffianni siulittaasoq Elias Inuusuttoq KNR-mut oqarpoq.
Saammarsaat
Qaannat unammersuerneranni peqataasut ikinnerutinnissaat pingasunngornermi unnukkut ataatsimiinnermi oqaluuserineqartut ilagaat.
AAMMA ATUARUK Corona: Tunillatsissimasoq nutaaq Ilulissani paasineqarpoq
- Peqatigiiffiit tamarmik immikkut tallimaannarnik peqataatitsisinnaanerat eqqartorneqaraluarpoq. Tamatumalu allanngortissinnaanngilaa atortut arlalinnit atorneqartarmata assersuutigalugu allunaariaqattaarnermi, Elias Inuusuttoq oqarpoq.
Saammarsaatissatut aalajangiunneqarpoq naliliisartunik peqatigiiffilerisunillu pikkorissaasoqassasoq. Tamanna Maniitsumi juulip qulinganiit 17-ta tungaanut pissaaq peqatigiiffiillu arfinilinnik peqataatitaqarsinnaassallutik.
QU 2021 Ilulissani pissaaq.