Corona pillugu ullumikkut kisitsisit: Tunillatsissimasut nutaat qulit
Nuummi tunillatsissimasut nutaat tallimat Sisimiunilu tunillatsissimasut nutaat tallimat ippassarmit ullumimut paasineqarput.
Nakorsaaneqarfik taama paasissutissiivoq.
Sisimiuni atuarfimmit siaruaappoq. Nalunnguarfiup Atuarfiani 5. klassimi atuartoq tunillatsissimasoq paasineqarpoq taassuma atuaqatai ilinniartitsisuilu angerlarsimaannartinneqarput.
Atuarfimmi tassani atuartunik allanik tunillatsissimasunik ullumikkut paasisaqartoqarpoq. Atuarfiup pisortaa, Anna Lise Kreutzmann Facebookikkut allappoq.
AAMMA ATUARUK Corona pillugu ullumikkut kisitsisit: Tunillatsissimasut nutaat qulit
2., 3., 4., 5. klassimilu atuartuupput, atuartullu taakku tamarmik angerlartinneqarput. Taakku tunillatsissimannginnerminnik uppernarsaateqalerunik aatsaat atuariartoqqissinnaapput.
Tunillatsissimasut ullumikkut amerlassusaat kommunikkaarlugit:
- Avannaata Kommunia: Tunillatsissimasoqanngilaq
- Kommune Qeqertalik: Tunillatsissimasoqanngilaq
- Qeqqata Kommunia: Tunillatsissimasut arfinillit
- Kommuneqarfik Sermersooq: Tunillatsissimasut 50
- Kommune Kujalleq: Ataatsimik tunillatsissimasoqarpoq
Nunatsinni tunillatsissimasut katillugit maanna 57-iupput.
Tunillatsissimasut ikiliartorput. Tunillatsissimasut amerlanerpaagamik septembarip naanerani 143-pput.
Tunillatsissimasullutik napparsimmavimmut uninngasunit marlunnit ataaseq peqqissilluni angerlartinneqarpoq. Tamatumali nalaani alla covid-19-imik tunillatsissimasoq napparsimmavimmi aamma uninngavoq, taassumali uninnganera coronamik pissuteqanngitsoq, Nakorsaaneqarfik paasissutissiivoq.