Corona pillugu ullumikkut kisitsisit: Tunillatsissimasut nutaat qulit

Sisimiuni atuartoq tunillatsissimasoq paasineqarpoq, taamaammat nunatsinni illoqarfiit annersaata tulliani tuniluuttoqaqqilerpoq.
Nuummi misissuisarfimmut siuleriiaattut. Toqqorsivimmit assi Assi © : Arkiv: KNR
Allattoq Christine Hyldal
oktobarip 07-at 2021 13:28

Tunillatsissimasut nutaat qulingiluat Nuummiittut ataaserlu nutaaq Sisimiuniittoq paasineqartut ullumikkut kisitsisit takutippaat.

Tunillatsissimasoq nutaaq Sisimiuniittoq meeqqat atuarfianni atuartuuvoq, taamaammat Sisimiuni inuiaqatigiit akornanni tuniluuttoqaqqippoq, Nakorsaaneqarfik paasissutissiivoq.

Tunillatsissimasoq Nalunnguarfiup Atuarfiani atuartuuvoq, taassumalu atuaqatai ilinniartitsisuilu angerlarsimaannartussanngortinneqarput.

Nuummi tunillatsissimasuni nutaani ataaseq Inuunerup Nutaap Oqaluffiani sapaatiummat nalunaaqutaq aqqanermut naalagiarsimavoq.

Nunatsinni tunillatsissimasut katillugit maanna 47-pput.

Tunillatsissimasut 45-t Kommuneqarfik Sermersuumiipput.

Sisimiuni nutaamik ataatsimik tunillatsissimasoqaqqilerpoq, Kommune Kujallermilu ataatsimik aamma tunillatsissimasoqarluni.

Tunillatsissimasut amerlassusaat ikiliartorput. Tunillatsissimasut amerlanerpaagamik septembarip naanerani 143-pput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq