Corona pillugu ullumikkut kisitsisit: Nuummi tunillatsittut nutaat arfineq-pingasut
Tunillatsissimasut nutaat arfineq-pingasut ippassarmit paasineqarput.
Nakorsaaneqarfik taama paasissutissiivoq.
Tunillatsittunit arfineq-marluk inersimasuupput ataaserlu meeraalluni.
Sisimiuni tunillatsissimasunik nutaanik paasisaqartoqanngilaq.
Nunatsinni tunillatsissimasut katillugit maanna 89-iupput – amerlanerpaallu illoqarfiit pingaarnersaanniillutik.
Tunillatsissimasut kommunikkaarlugit ullumikkut ima amerlassuseqarput:
- Avannaata Kommunia: 1
- Kommune Qeqertalik: 0
- Qeqqata Kommunia (Sisimiut): 9
- Kommuneqarfik Sermersooq: 79-it – ippassaq 72-iupput.
- Kommune Kujalleq: 0
Nuummi tuniluunneq sapaatip akunnerani kingullermi siammaappoq. Ullut qulingiluat matuma siorna tunillatsissimasut illoqarfiit pingaarnersaanniittut arfiniliinnaapput - paaqqinniffimmilu Timmiaaqqani tuniluuttoqarneruleqqaarpoq.
Tuniluunneq tassannga paaqqutarinniffinnut allanut, sunngiffimmi ornittakkanut atuarfinnilu klassinut siaruaappoq.
Ullumili tunillatsissimasutut paasineqartut akornanni meeraq ataasiinnaavoq, tamannalu Nakorsaaneqarfiup mianersortumik neriuuteqarfigaa:
- Paaqqutarinniffinni tuniluunneq maanna pakkersimaarneqarsinnaalerpasippoq, ilaqutariinnili meerartalinni nutaanik tunillatsissimasoqarsinnaanera suli naatsorsuutigineqassaaq, Nakorsaaneqarfik paasissutissiivoq.
Inersimasorpaaluit tunillatsissimasut sapaatip akunnerata naanerata kingorna paasineqarput. Taakku tallimanngornermi arfininngornermilu imerniartarfissiorsimapput, ilaatigut Kristinemut, Daddy's Skylinelu isersimaffigineqarsimallutik. Amerlanerpaalli Kristinemumiissimapput.
Taamaammat illoqarfiit pingaarnersaanni sumiiffinni tamani tunillatsinnissaq aamma aarlerinaateqarpoq.
