Corona pillugu ullumikkut kisitsisit: Nutaanik tunillatsissimasoqanngitsoq
Ullup ataatsip kingulliup ingerlanerani tunillatsissimasunik nutaanik paasisaqartoqanngilaq. Nakorsaaneqarfik taama paasissutissiivoq.
Nunatsinni tunillatsissimasut katillugit amerlassusaat kommunikkaarlugit taamaalillutik imaalerput:
- Avannaata Kommunia: Ataaseq
- Kommune Qeqertalik: 0
- Qeqqata Kommunia: 15-it
- Kommuneqarfik Sermersooq: 38
- Kommune Kujalleq: 0
Nunatsinni tunillatsissimasutut 54-it maanna nalunaarsorsimapput.
Sapaatip akunnerata naanerani tunillatsissimasut nutaat qulingiluat paasineqarput - taakkunannga arfineq-pingasut Nuummiipput ataaserlu Maniitsumiilluni.
AAMMA ATUARUK Timmiaaqqat Narsarmiutarlu suli matoqqassasut
Illoqarfiit pingaarnersaanni tunillatsissiamsut sapaatip akunnerata naanerani paasineqartut tamarmik meeqqerivimmut Timmiaaqqanut attuumassuteqarput. Tunillatsissimasut nutaat meeqqerivimmiittartumut angajoqqaanngikkunik qatanngutaapput.
Meeqqerivimmi meeqqamik sulisumillu tunillatsittoqarnerata paasineqarnerata kingorna matuneqarallarpoq - tamatumalu kingorna illoqarfiit pingaarnersaanni tunillaassuunneq sukkasuumik ingerlanerpoq: Meeqqat atuarfiini ASK-imi klassimi ataatsimi atuartut angerlartinneqarput, USK-imi klassini pingasuni atuartut angerlartinneqarput, aamma sunngiffimmi ornittakkat Narsarmiutaq aamma AKO Illu matoqqagallartinneqalerlutik.
Nuummi tunillatsissimasut sapaatip akunnerata ataatsip matuma siorna arfineq-marluinnaapput.
