Corona pillugu killiffik: Nutaanik tunillatsittoqanngilaq

Inuit qulit coronavirusimik tunillatsinnikuupput. Taakku tamarmik Nuummiipput, sineriatsinnilu tunillatsinnikoqarani.

Coronamik tunillatsissimasut pillugit killiffik pillugu tusagassiortunut ullumi katersortitsinermi tamanna oqaatigineqarpoq.

Tunillatsissimasunit qulinit suli marluinnaat peqqissinikuupput, arfineq-pingasut sinneri suli napparsimapput. Taakku angerlarsimaffimminni mattuteqqapput. 

- Tunillatsissimasut arfineq-pingasut peqqissiartorput, nakorsaaneq, Henrik Hansen oqarpoq.

Nunatsinni inuit 513-it misissorneqarnikuupput.

- Misissuisarnitta aallartinnerani nassuiaatigineqartunik ersiuteqartut taamaallaat misissortarnikuuagut. Taakku WHO-mi innersuussutigineqarput. Nassuiaatillu kingorna allanngortinneqarput.

AAMMA ATUARUK Oqartussat pinngitsaaliissummik katsorsaasinnaalersut

Maanna misissorneqarsinnaasut eqimattanut agguataarneqarput:

- Eqimattat Nuummiit aallarsimasut. Eqimattap aappaanit misissorusutagut tassaapput napparsimanermut ersiuteqartut angalasimanngitsullu - taakkuli nunatta avataanut Nuummullu angalasimasunik naapitaqarsimasut. Taakku tassaasinnaapput atuartunut angerlarsimasut kingornalu ilaquttaminnik kammalaatiminnillu naapitsisimasut, nakorsaaneq oqarpoq.

Misissorneqartut amerlissasut, nakorsaaneq oqarpoq.

- Illoqarfinni minnerusuni inuit tallimanit qulinut sapaatip-akunneranut misissortalerniarpagut. Illoqarfinni annerusuni inuit sapaatip-akunneranut 20-t tikillugit. Matumani inuiaqatigiinni siammasissumik tuniluuttoqarneranik misissuinissaq siunertaavoq. Coronavirusip ersiutigisai nuannermut nalinginnaasumut assingupput ilaallu anersaartorfitsigut aattortinnerullutik, toqqusaakku anniarneq, napparsimasutut misigisimaneq, panertumik quersorneq kissarneqarnerlu.

- Ersiuteqanngitsunik misissuissanngilagut.