Sisimiuni Taseralimmi saqqummersitsinermi nutaami Goroona taaguutigineqarpoq. Eqqumiitsulianik saqqummersitsineq coronamut tunngavoq Sisimiunilu inuit qaammatini kingullerni qanoq misigisimanerannut tunngalluni.

Coronavirusip nunarsuaq tamakkerlugu sunneqavaa. Aamma sumiiffiit tunillatsissimasunik suli nalunaarsuiffiusimanngitsut.

Sisimiuni covid-19-imik tunillatsissimasoqarnikuunngilaq.

Tunillatsimasulli Aasianniittup qaammat kingulleq Sisimiuni innuttaasut aamma sunniiffigai. KTI-mimi atuartup tunillatsissimasoq Aasianniittoq qanillisimavaa, tamannalu atuarfiup qisuariarfigalugu atuartut 80-it sillimaniarneq pissutigalugu angerlartippai.

Nammineq kajumissutsimik angerlartitsineruvoq, atuartorlu tunillatsissimanngitsoq uppernarsarneqarpoq.

AAMMA ATUARUK Coronamik tunillatsissimasoq Aasianniittoq: Sisimiuni atuartut 80-it angerlartinneqartut

Naak nunatsinni tunillatsissimasumik nalunaarsimsoqarunnaaqqikkalaurtoq, tamanna Sisimiuni amerlasuut ulluinnaanut qanoq allannguineranut eqqaasitsissutissaavoq.

Qeqqata Kommuniani pisortaaneq, Juliane Henningsen saqqummersitsinermut atatillugu oqarpoq.

- Upernaaq tamaat ullut tamaasa pisunik malinnaavugut, inuunitsinnilu allannguutaasut, misigisagut ataasiakkaatut inuiaqatigiittullu takusagut - misigissutsigut inooriaatsittalu allanngortariaqarnerani pisut ilaatigut saqqummersitsinermi uani takusinnaavagut, pisortaaneq oqarpoq.

- Pisut imaannaanngitsut nalaanni - saqqummersitsinermi uani takusinnaavarput qanoq misigisaqartoqarsimanersoq - qanoq nutaaliortoqarsimanersoq - qanorlu eqqarsaateqartoqarsimanersoq.

Saqqummersitsineq Qeqqata Kommuniata eqqumiitsuliortullu Arnajaraq Støvlbækip suleqatigiinneratigut piviusunngortinneqarpoq.

Saqqummersitsineq ”Goroona”-mik taaguuteqartinneqarpoq.

Saqqummersitsoqannginnerani innuttaasut nunarsuarmi pissutsit pillugit namminneq qanoq misigisimanerminnik nassiusseqquneqarput. Taakku assinngorlugit, qalipaganngorlugit titaganngorlugit nassiunneqarput – taakkulu saqqummersitsissutigineqarlutik.