Corona: Meeqqat minnerit tallimanngorpamit akiuussuserneqarsinnaalissasut
Meeqqat tallimanit aqqanilinnut ukiullit coronavirusimut akiuussuserneqarsinnaalissapput.
Meeqqamik taama ukiulimmik Nuummi Inussivimmi jannuaarip ulluisa 14-ianni kapisisoqaqqaassaaq.
Nunatsinni Nakorsaaneqarfik tusagasssiuutinut taama nalunaaruteqarpoq.
- Meeqqat akiuussuserneqarnissaat innersuussutigaarput, pitsaanerusumik nappaalanersuarmik nakkutiginnissinnaalerniassagatta, maannakkut meeqqat ukiukitsut akornanni tuniluunneq annertusiartortillugu, nunatsinni nakorsaaneq, Henrik L. Hansen oqarpoq.
Nunatsinni akiuussusiinerit
Nunatsinni Nakorsaaneqarfiup nalunaarsuutai nutaanerpaat naapertorlugit nunatsinni innuttaasut 71 procentii coronavirusimut ataasiarlutik kapitereerput.
67 procentii marloriarlutik kapitereerput.
Tusarfik: corona.nun.gl
Meeqqat coronamik napparsimanerminni qaqutigut perululertarput. Akiuussuserneqarpatali tuniluunnernik unitsitsisoqarsinnaasoq, taamaalillunilu allat illersorneqarsinnaasut, nakorsaaneq nassuiaavoq.
- Inuiaqatigiinni tuniluunneq annikillisinneqassaaq, taamaalilluta peqqissaaviit sapinngisamik pisariaqanngitsumik artukkinnginniassagatsigit, aammalu ulluinnarni inuunitsinnut nalinginnaanerusumut sungiusimanerusatsinnut ingerlaqqissinnaalerniassagatta, nunatsinni nakorsaaneq Henrik L Hansen oqarpoq.
Marloriarlutik kapitissasut
Tallimanit aqqanilinnut ukiullit Pfizer-BioNTechimit akiuussummik kapineqassapput.
Inersimasuninngaanniit minnermik akiuussuserneqassasut, pitsaanerpaamillu illersorneqarniassagamik marloriarlutik kapitissasut, nakorsaaneqarfik allappoq.
Meeqqat pingasoriarlutik kapineqarnissaannut maannakkuugallartoq pilersaaruteqanngilaq.
AAMMA ATUARUK Misissuisarfiit napparsimmaviillu ilungersungaatsiarmata kikkunnut tamanut PCR-imik misissuisoqartarunnaartoq
Meeqqat qaqugu sumilu akiuussuserneqarsinnaanersut, Nunatsinni Nakorsaaneqarfiup nittartagaani corona.nun.gl-imi takusinnaavat.
Meeraq akiuussuserneqassappat, angajoqqaaq meeqqamulluunniit akisussaassuusoq atsiornermigut akuersissaaq.
