Uummannaq: Aalisartut sillimmasiisarfimminnit taarsiivigineqarsinnaanngillat
Uummannami Nukissiorfinni sulisut imeq uuliamik kukkulluni akummagu Avannaata Seafoodip Royal Greenlandillu tunisassiorfitik erngertumik matuaat aalisartut tunisisinnaajunnaarlugit.
Aalisartut isertitassaraluatik annaavaat, taakkulu pillugit Nukissiorfiit sillimmasiisartunut saaffiginneqqusipput.
- Nukissiorfinnit imermik imerneqarsinnaasumik minguitsumik pissarsisinnaaneq amigaataasimappat, tamatumalu kingunerisaanik nammineq suliffeqarfiutigisami iluanaarutissanik annaasaqarsimalluni, taava qaqutiguunngitsumik ingerlatsinermi annaasaqaatinut sillimmaserneqarsimanikkut taarsiiffigitittoqarsinnaavoq. Imaappat ingerlatsinermi annaasaqaatinut sillimmateqarluni taava tassunga saaffiginnittoqassaaq, Nukissiorfiit taama paasissutissiipput.
- Septembarip 20-at: Uummannami imeq uuliamik mingutsinneqarsimasoq innuttaasut ilisimatinneqarput. Tamanna septembarip 11-anni pisimasoq, tassanilu Nukissiorfinni sulisup klori akuutissaq atornagu uulia akuleruttoorsimavaa.
- Innuttaasup piffissami tassani pasitsaassaqalerput, imermi uuliarsunnittoq naamaneqarsinnaammat.
- Nukissiorfinni sulisut imermut klorimik kuisigaangamik kiinarpaqartarput, taamaammat sulisup uulia kuigamiuk naamasinnaasimanagu, Nukissiorfiit ilisimatitsipput. Uulia klorilu assigiillutik akimut ersittumik qalipaateqarput.
- Uummannami tunisassiorfiit septembarip 19-aniit ullualunni matoqqasarsimapput.
- Meeqqat atuarfiat meeqqeriviillu aamma matoqqatinneqarnikuupput, maannali ammaqqinneqarsimallutik.
- Imeq minguitsoq imertartarfinnut pisillugu Uummannamut assartartorneqartarpoq, taamaalilluni innuttaasut namminneq imertartarlutik. Umiarsualivimmit nilaat aamma agguaanneqartarput.
- Imeqarfimmi imeq minguitsunngorsimasoq septembarip 29-anni nalunaarutigineqarpoq. Imeqarfimmiilli erngup akuerineqarnera Nukissiorfinnit aqaguani uterteqqinneqartariaqarluni.
- Imeq qaqugu imerneqaqqissinnaalissanersoq Nukissiorfinnit suli oqaatigineqarsinnaanngilaq.
Taamaattoqarsinnaanngitsorli nunatsinni sillimmasiisarfiit marluk KNR-imut paasissutissiissutigaat.
- Aalisartut sillimmasiisarfimmiit ikiorneqarsinnaassanngillat, nammineq suliffeqarfiutaa ajoqqusersimanngimmat. Sulimi aalisarsinnaavoq unammilligassariinnarpaalu aalisakkami tunitsivissaqannginneri, Illit Forsikringimi sillimmasiisitsisartoq Nicolaj Graversen oqarpoq.
Sillimmasiisarfik alla, tassa IF Kalaallit Forsikringip qullersaqarfiata ingerlatsinermut annaasaqarnissamut sillimmasiisarpoq.
Suliffeqarfinnili pisattat innarlersimatillugit aatsaat taarsiisoqarsinnaasarluni. Soorlu assersuutigalugu ikiuallattorneqarnerani atortut tamarmik annaaneqarlutik. taava sillimmasiisarfiup isertitassaraluit matussusersinnaasarlugit.
- Kinaluunniit suliffeqarfimmit taarsiiffigineqarnissamut piumasaqartoq, piumasaqaatini uppernarsarlugit amerlassusilertariaqarpai. Sulialli akisussaasutut taarsiinissamut tunngasut imminnut ilarussuuttukkajupput, paasissutissarpassuit atugassaapput, iliuuseq akisussaanermik kinguneqassanersoq nalilerniarlugu misissugassaqaqaaq taavalu ajoqusiisoq inatsit malillugu taarsiisussaatitaanersoq aamma naliligassaalluni.
Nukissiorfinnut annaasaqaatit saaffiginnissutigeqquneqartut
Ingerlatsinermut annaasaqarnissamut sillimasersimanngikkaluartut Nukissiorfiit aamma saaffiginneqqullugit kaammattorpai:
- Paarlattuanik annaasaqaatigisimasat naatsorsorneqassapput kiisalu Nukissiorfinnut allakkatigut saaffiginnittoqassaaq. Taamaalisoqarpat taava Nukissiorfiit sillimasiissuteqarfigisani suleqatigalugu suliat ataasiakkaat immikkoortukkaarlugit nalilersussavaat, Nukissiorfiit nittartakkaminni taama allapput.
AAMMA ATUARUK Nukissiorfiit sulinermi isertitassat annaasat pillugit: Illit sillimmasiisarfiit saaffigiuk
Ingerlatsinermut annaasaqarnissamut sillimasersimanngikkaluartut Nukissiorfinnut piumasaq saaffiginnissutigeqqullugit suliffeqarfiup kaammattorpaat.
- Aalisartut suliffeqarfiillu annaasaqarsimasut taarsiivigineqarnissaannut tunngatillugu tamakkiisumik akisinnaangilagut. Suliassat tamarmik allatut isikkoqarput ataasiakkaarlugillu suliarineqassallutik. Taamaattumik tamanut atuuttumik nalunaaruteqarsinnaanngilagut, Nukissiorfimmi tusagassiuutinut attaveqatigiinnermilu siunnersorti, Heidi Møller Isaksen oqarpoq.
Taarsiissuteqarnissamut tunngasoq Nukissiorfiip nittartagaani uani takusinnaavat.
